رووداو چیرۆکی قوربانییەکی بەکارهێنانی دەرزیی هۆرمۆنەکان بۆ لەشجوانی ئاشکرادەکات

 

یاریزانێکی لەشجوانی لە دهۆک شەش ساڵە دەرمان و دەرزیی هۆرمۆن بەکاردەهێنێت، رووداو قسەی لەگەڵ ئەو یاریزانە کردووە و دەڵێت: لە شەش قارەمانێتی لەسەر ئاستی هەرێمی کوردستان و عێراق پاڵەوان بووە، بەڵام ئێستا پەشیمانە، چونکە کاریگەرییە لاوەکییەکانی هۆرمۆنەکانی لەسەر دەرکەوتوون.

 

ئەو یاریزانە دەڵێت: ''شەش ساڵ هۆرمۆنم بەکارهێنا، بەڵام ئێستا گورچیلە و جگەرم پەکیان کەوتووە و هەوکردنی نێو خوێنم بەرزە''، هەروەها ئەوەش باسدەکات کە سەرەتا رازینەبووە هۆرمۆن بەکاربهێنێت، بەڵام بۆ یارییەکەی باش بووە و چەندین نازناوی بەدەستهێناوە.

 

هاوکات ئەوەشی ئاشکراکرد، بەهۆی بەکارهێنانی زیادلەپێویستی هۆرمۆنەکان، هاوسەنگیی تێکچووە و تووشی هەوکردنی خوێن بووە. 

 

بە گوێرەی بەدواداچوونەکانی هونەر رەشید، پەیامنێری رووداو لە دهۆک، بەشێک لە هۆرمۆنەکان بە قاچاخ دەهێندرێنە هەرێمی کوردستان و بە نایاسایی لە هۆڵەکانی لەشجوانی دەفرۆشرێن.

 

نیوار لەزگین، راهێنەرێکی لەشجوانییە و ئاماژە بەوەدەکات، زۆرێک لە یاریزانان پێویستیان پێی نییە، بەڵام بەکاری دەهێنن و زیانیان پێدەگەیێنێت.

 

بەپێی راهێنەران، دەبێت یاریزانان 10 بۆ 30 ئەوەندەی رێژەی ئاسایی هۆرمۆنی تێستۆستیڕۆنی جەستە هۆرمۆنەکە بەکاربهێنن تاوەکو کاریگەرییەکەی لەسەر ماسوولکەکان دەربکەوێت و کەسەکە ''لەشی جوان بێت''.

 

 

- لاوازبوون و پەککەوتنی گورچیلەکان 

- ئەگەری تووشبوون بە شێرپەنجەی گورچیلە زیاددەکەن

- گوشاری خوێن بەرزدەکەنەوە

- ماسوولکەی دڵ ئەستووردەکەن

- نەزۆکی

- لاوازیی سێکسی

- پەککەوتن و لاوازبوونی جگەر

- لاوازبوونی جەستە لە فڕێدانی ژەهرەکان

 

بازرگانێکی هۆرمۆنەکان قسەی بۆ رووداو کردووە و دەڵێت: ''لەڕێگەی پەیجە ئۆنلاینەکانەوە زۆرێک لەو دەرمانانە دەفرۆشرێن و لەڕێگەی کەسی نزیک و ناسیاوەوە بەسەر کڕیاران دابەشدەکرێن''.

 

تەنانەت ئەوەش باسدەکات کە نرخەکانیشیان لە 40 دۆلار تاوەکو 200 دۆلارن.

 

بەدواداچوونی رووداوی بەردەوام دەبێت و هونەر رەشید دەچێتە لای لیژنەی بەدواداچوون بۆ هۆرمۆنەکان و کاوار رەشید، ئەندامی ئەو لیژنەیە قسەدەکات: ''زۆر بەرهەمی هۆرمۆنمان لەنێو بردوون و هیچ بنەمایەکی تەندروستییان نییە، تائێستا زیاتر لە 250 دەرزیی هۆرمۆنمان لەنێوبردووە''.

 

کاوار رەشید پشتڕاستی دەکاتەوە، لەلایەن کەسانی نادیار و سەرچاوەی باوەڕپێنەکراو ئەو هۆرمۆنانە دەکڕدرێن و زۆرینەیان قاچاخن.

 

عەلی حوسێنیش کە سەرۆکی یەکێتیی لەشجوانییە لە دهۆک گوتی، هەر کارێکی نایاسایی لەنێو هۆڵەکانی لەشجوانی بکرێت، ئەو هۆڵە سزادەدەن و تائێستا 10 هۆڵ سزادراون، تەنانەت ئەوەش باسدەکات کە ئەو هۆرمۆنانە نابێت لە هۆڵەکان بکڕدرێن.

هەر لەبارەی زیانەکانی ئەو هۆرمۆنانەوە ئەم بابەتەش ببینە؛