تەندروستی
د. سانا ئیسماعیل و تیمەکەی لە کاتی نەشتەرگەریی منداڵبوونەکە. وێنە: لەلایەن د. ساناوە نێردراوە
رووداو - تەندروستی
ماڵباتێکی قەزای تەق تەق دوای نۆ ساڵ چاوەڕوانی یەکەم منداڵیان لەدایکبوو، منداڵەکە لە نەخۆشخانەی شەهید دکتۆر خالید لە کۆیە لەدایکبووە و پسپۆڕی سەرپەرشتیار دەڵێت، تەندروستیی دایک و منداڵەکە زۆر باشە و هۆکاری دواکەوتنی منداڵبوونەکەش ئاشکرادەکات.
ئەو منداڵە دوێنێ چوارشەممە لەدایکبووە و ئەمڕۆ پێنجشەممە 9-1-2025 د. سانا ئیسماعیل بەقاڵ، سەرپەرشتیاری کەیسەکە و پسپۆڕی خانمان و منداڵبوون لە نەخۆشخانەکە بە رووداوی راگەیاند، خانمەکە بەتەواوی بێئومێد بووبوو لە دۆخەکەی، بەڵام بەهۆی پشتگوێخستنی دۆخەکەی و ناڕێکیی لە بەکارهێنانی چارەسەرییەکان، نەتواندرابوو منداڵبوونی سەرکەوتووبێت، هەر بۆیە لە ژێر چاودێریی وردی د. سانا پڕۆسەکە سەرکەوتوو بووە.
د. سانا ئیسماعیل دەڵێت: ''منداڵەکە کوڕە و بە تەندروستییەکی باشەوە بە نەشتەرگەری بە 9 مانگ لەدایکبووە، پێویستیشی بە ژوورە شووشەییەکان نەبووە''.
د. سانا بەقاڵ روونی دەکاتەوە، ئەمە چەند جارێکە کە لەدوای ماوەیەکی زۆر چاوەڕوانی، منداڵ لەدایکدەبن، ئەو خانمەش نزیکەی 32 ساڵان بووە و كێشەی فرەکیسی هێلکەدانی هەبووە، هەر ئەوەش بووەتە رێگر لە منداڵبوونی و هۆرمۆنەکانی ناڕێک کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ