پسپۆڕێکی کورد پلەی یەکەم لەسەر ئاستی عێراق لە پسپۆڕیی نەخۆشییە گوازراوەکان وەردەگرێت

 

د. نەوفەل رەشید لە ریزبەندیی (AD scientific index) توانیویەتی پلەی یەکەم لەسەر ئاستی عێراق و پلەی 232 لەسەر ئاستی جیهانی لە بواری نەخۆشییە گوازراوەکان بەدەستبهێنێت.

 

ئەمڕۆ یەکشەممە 6ـی تشرینی یەکەمی 2024 د. نەوفەل رەشید، توێژەری نەخۆشییە گوازراوەکان و راگری کۆلێژی پزیشکیی زانکۆی زاخۆ لە بەرنامەی 'رۆژی هیوا جەمال' بە رووداوی راگەیاند، ئەوە دووەم ساڵە لەسەر یەک کە ئەو پلەیە بەدەستدەهێنێت و داواشدەکات کە زیاتر بایەخ بە توێژەران بدرێت بۆ بەرەوپێشچوونی کوالێتیی و ئاستی توێژینەوەکانیان.

 

د. نەوفەل رەشید لەبارەی ئەو نەخۆشییە گوازراوانەی کە لە ماوەکانی رابردوو و تەنانەت ئێستاش لە هەرێمی کوردستان هەن گوتی، لاوازیی ژێرخانی تەندروستی لە هەرێمی کوردستان هۆکارێکە بۆ زیاتر بڵاوبوونەوەی نەخۆشییەکان و پێویستە بە توێژینەوە رێگەچارەسەرییەکان بدۆزرێنەوە و کاریان پێبکرێت.

 

لە بەشێکی قسەکانیدا ئەو پسپۆڕە باسی سیستمی هەرێمی کوردستان دەکات بۆ رووبەڕووبوونەوەی نەخۆشییە گوازراوەکان و دەڵێت: ''شەڕکردن دژی نەخۆشییە گوازراوەکان پێویستی بە بودجەیەکی زۆر هەیە و ئێستا کێشەی کەمیی بودجەمان هەیە''، بەڵام لەلایەنی زانستییەوە خۆشبەخانە گوتی، ''لەو ڕوانگەیەوە کێشەکە کەمترە''.

 

بە گوتەی ئەو پسپۆڕە، ریزبەندییەکە بەجۆرێکە کە بۆ هەموو لێکۆڵەرە جیهانییەکانە و توێژینەوەکانیان پێشکێشدەکەن و پاشانیش هەڵدەسەنگێندرێن و ریزبەندییان بۆ دیاریدەکرێن.