نەخۆشخانەی منداڵانی سلێمانی: رۆژانە 150 بۆ 300 تووشبووی سکچوون و رشانەوە تۆماردەکرێن

 

ئەمڕۆ سێشەممە 5ـی ئەیلوولی 2023 د. پشدەر عەبدوڵڵا، بەڕێوەبەری گشتی نەخۆشخانەی د. جەمال ئەحمەدی منداڵان رایگەیاند، جگە لە کۆلێرا تووشبووی ڤایرۆس و مشەخۆریش هەن کە سکچوون و رشانەوەیان هەیە، بۆیە رێنوێنیی هاونیشتمانییان دەکات کە بەبێ راوێژی پزیشک و پشکنین، دەرمان بەکارنەهێنن.

 

د. پشدەر عەبدوڵڵا ئاماژە بە زۆریی ژمارەی تووشبووانی کۆلێرا دەکات و دەڵێت: ژمارەی تووشبووانی کۆلێرا زۆر زیاترە لەوەی کە پشتڕاستکراوەتەوە، چونکە بەشێکی تووشبووان نیشانەکانیان لاوازە و هەستیان پێناکرێت.

 

د. پشدەر دەشڵێت: ''رۆژانە زیاتر لە 500 منداڵ، سەردانی نەخۆشخانەکە دەکەن، لەو ژمارەیەش 150 بۆ 300ـیان تووشی سکچوون و رشانەوە بوون، هەروەها بەدرێژایی سێ مانگی رابردوو هەمیشە تووشبووانی سکچوون و رشانەوە هەبوون، بەڵام بەم رێژەیەی ئێستا نەبووە کە تووشبووی کۆلێرا بەم شێوەیە زیادبکات''. 

 

ئەو بەڕێوەبەرەی نەخۆشخانەی منداڵانی سلێمان ئاماژە بەوەشدەکات، جگە لە کۆلێرا ڤایرۆس و مشەخۆر هۆکاری زۆربوونی ژمارەی تووشبووانی سکچوون و رشانەوەن کە 'ئاو و خۆراکی پیسبوو' سەرچاوەی تووشبوونیانن.

 

بە گوتەی د. پشدەر، زۆرینەی تووشبووانی سکچوون و رشانەوە، خەڵکی ئەو گەڕەکانەبوون کە سەرچاوەی ئاوی خواردنەوەیان نادیاربووە و لەڕێگەی تانکەرەکانەوە ئاویان وەرگرتووە.