رووداو - تەندروستی
ئەم هەفتەیە نەخۆشنامە بە باسی ئەو کەسانە دەستپێدەکات کە سووتاون و بەهۆی رێکاری هەڵەوە تووشی چەندان پاشهاتی مەترسیدار بوونەتەوە، د. هونەر رێبوار، پێشکێشکاری پۆدکاستەکە دەڵێت: زۆرجار سووتاوی ناهێندرێتە نەخۆشخانەکان، چونکە خەڵک نەوێراوە بهێندرێتە نەخۆشخانە لەبەر ئەوەی ''پێیان وایە لە نەخۆشخانەی دەرزی لێدەدەن و دەیکوژن''.
د. ئاڵا ئیسماعیل، پسپۆڕی نەشتەرگەرییەکانی جوانکاری و سووتاوی میوانی پۆدکاستەکەیە و دەڵێت، سووتان بە کاریگەریی بەرکەوتن بە گەرمیی زۆر باوە و پێویستە دەستبەجێ نەخۆشەکە بگەیێندرێتە نزیکترین نەخۆشخانە و بنکەی تەندروستی بۆ ئەوەی پاکژکردنەوە و رێکاری تایبەتی بۆ بکرێت.
د. ئاڵا ئیسماعیل دەڵێت: ٪80 بۆ ٪90ـی منداڵان بەهۆی بەکارهێنانی سۆپاوە دەسووتێن بەهۆی دانانی ئاوی گەرم لەسەر سۆپاکە و لەکاتی یاریکردن ئاوەکەی بەسەرداڕژاوە.
لەبارەی فریاگوزاریی سەرەتایی بۆ سووتان ئەمانە پێشنیازدەکات؛
- دەرگە و پەنجەرەکانی ئەو شوێنەی سووتانەکەی تێدایە بکرێتەوە.
- جلوبەرگی سووتاو لاببرێن و کەسەکە بە ئاوێکی فێنک ساردبکرێتەوە، نابێت بەفراو بەکاربێت.
- نەخۆشەکە دابپۆشرێت بە بەتانییەک، ئینجا ببرێتە نەخۆشخانە.
- هیچ مەڵهەم و مادەیەک بۆ شوێنی سووتاوییەکە بەکارنەهێندرێت تاوەکو دەگەیێندرێتە نەخۆشخانە بۆ ئەوەی پزیشکان بە ئاسانی ئاستی سووتاوییەکە دیاریبکەن.
- نابێت هەویری ددان و ئاوتەماتە لەسەر شوێنی سووتاوی بەکاربێت، چونکە دەشێت زۆر بە ئاسانی میکرۆب بچێتە نێو جەستە.
کەسێک سووتا ببرێت بۆ کوێ؟
* لە هەولێر نەخۆشخانەی ئیمێرجنسی یاخود نەخۆشخانەی فریاکەوتنی رۆژئاوا
* لە سلێمانی نەخۆشخانەی ئیمێرجنسی یاخود نەخۆشخانەی سووتاوی
* لە هەولێر نەخۆشخانەی فریاکەوتن
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ