راپرسییەکی دێسکی تەندروستیی رووداو: 41٪ـی خەڵک دەیانەوێت ئەمساڵ کۆتایی بە ورگیان بهێنن
رووداو - تەندروستی
ئەنجامی راپرسییەکی دێسکی تەندروستیی رووداو دەریدەخات، زۆرینەی ئەوانەی دەیانەوێت لەمساڵدا تەندروستیی خۆیان باشتربکەن و بە تەندروستی بمێننەوە، دەنگیان بە کۆتاییهێنان بە ورگیان داوە.
لە راپرسییەکانی دێسکی تەندروستیی رووداو کە کۆتاییەکانی ساڵی 2024 دانرا و بۆ ماوەی هەفتەیەک بەردەوام بوو، هەزار و 522 کەس بەشداریان تێداکرد و دەرکەوت، 41٪ـی دەنگدەران کە زۆرترین بوون، دەیانەوێت لە ساڵی 2025 کۆتایی بە ورگیان بهێنن.
راپرسییەکە دەڵێت: ''دەتەوێت ساڵی داهاتوو کۆتایی بە کامیان بهێنیت؟'' بژاردەکانیش هەریەک لە 'ورگ، جگەرە و نێرگەلە، کحول، خواردنەوە گازییەکان و بیرکردنەوەی نەرێنی' بوون.
پلەی دووەمی راپرسییەکە کە خەڵکێکی زۆر دەنگی پێدابوو بریتیبوو لە بیرکردنەوەی نەرێنی کە 34٪ـی دەنگدەرانی پێکدەهێنا.