هەڵەیەک روویدا! دووبارە هەوڵبدە
رووداو - تەندروستی
بەڕێوەبەری نەخۆشخانەی منداڵانی سلێمانی رایدەگەیێنێت، هەموو مانگ و ساڵێک ژمارەی تووشبووانی سکچوون و رشانەوە لەنێو منداڵاندا بەرزە و هۆکارەکەش ئاو و خۆراکی پیسە.
ئەمڕۆ چوارشەممە 4ـی ئەیلوولی 2024 د. کۆیان زاهیر، بەڕێوەبەری نەخۆشخانەی د. جەمالی تایبەت بە منداڵان بە رووداوی راگەیاند: بەشێکی زۆری هۆکاری تووشبوونەکان بە سکچوون و رشانەوە ڤایرۆسی و مشەخۆر بووە کە بەهۆی خۆراکی ناخاوێنی دەرەوە و ئاوی پیسەوە دووچاری بوون.
د. کۆیان زاهیر هاوینشتمانییان ئاگاداردەکاتەوە کە بایەخ بە خۆراکی ماڵەوە بدەن و دووربکەونەوە لە خۆراکی سەر عەرەبانە و سەرچاوە نادیار.
لە بەشێکی قسەکانیدا ئەوەشی پشتڕاستکردەوە کە ''هیچ تووشبوویەکی کۆلێرا لەنێو منداڵان لەلای ئەوان دەستنیشان نەکراوە''.
بە گوتەی د. کۆیان زاهیر، ئەگەر منداڵ سکچوون و رشانەوەی هەبێت و پشتگوێبخرێت، ئەگەری وشکبوونەوەی تووندی جەستەی دەبێت، بەمەش ژیانی دەکەوێتە مەترسییەوە، چونکە دەڵێت: ''هەندێک لە تووشبووەکان دووچاری وشکبوونەوەی تووند بوون ئینجا هێندراونەتە نەخۆشخانەکە، کە لەو کاتەدا چارەسەرەکان قورس دەبن''.
تەنانەت جەخت لە پاکوخاوێنیی دەستەکان دەکات و رێنوێنیی هاونیشتمانییان دەکات، بایەخی زۆر بە شۆردنەوەی سەوزە و میوەکان بدەن و تادەتوانن خۆراک گەرم نەکەنەوە بۆ ژەمێکی دیکە، هەروەها خۆراکیش لەنێو ساردکەرەوەدا دابنێن.
بەپێی ئامارەکانی تەندروستیی سلێمانی، لە هەشت مانگی ئەمساڵدا لەو نەخۆشخانەیە پێنج هەزار و 400 تووشبووی سکچوون و رشانەوە تۆمارکراون؛ مانگی تەممووز زۆرترین تووشبووی تێدا تۆمارکراوە کە هەزار و 158 منداڵ بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ