دەروونناسێک: بۆ ئاگاداربوون لە دەروونی قوتابییان، پەیوەندیی دایباب لەگەڵ قوتابخانە پتەو بێت

 

لە بڕگەیەکی مەیدانیدا کە نالین حەسەن پێشکێشی کرد، لەنێو قوتابخانەیەک چەند پرسێکیان لەبارەی كێشە دەروونی و کۆمەڵایەتییەکانی قوتابییان باسکرد و میوانەکەی گوتی، لە هەرێمی کوردستان چارەسەرکارانی دەروونی کەمن و رۆڵی گرنگیان پێنەدراوە.

 

تەنیا بەدرەدین، دەروونناس دەڵێت: ''گرنگە دایک و باوکان هەمیشە لە پەیوەندیدابن لەگەڵ قوتابخانەی منداڵەکەیان، تاوەکو لە ئەگەری هەر کێشەیەکی دەروونیی منداڵەکەیان، ئاگاداربن و لە ماڵەوە و قوتابخانەکە هاوکاربن لە چارەسەرکردنی''.

 

هاوکات جەختیش لە کۆنتڕۆڵکردنی کاتی خەوتن دەدات بەوەی کە ئەگەر کۆنتڕۆڵنەکرێت ئەوا منداڵ تووشی چەندان کێشەی دەروونی و جەستەیی دەبێتەوە، هەر بۆیە پێشنیازدەکات، پێش خەوتن منداڵ لە هەواڵی ناخۆش و تووندوتیژی بەدووربێت و ئامێرە ئەلیکترۆنییەکانیش بەکارنەهێنێت.

 

ئەو دەروونناسە ئەنجامی لێکۆڵینەوەیەکی خۆی ئاشکرادەکات کە لەسەر 315 قوتابی کردوویەتی و دەڵێت، 'لێکجیابوونەوەی دایک و باوک، بەکارهێنانی مادەی قەدەخەکراو و هۆشبەر و دەستدرێژی بۆ سەر منداڵ' ئەو کێشانەبوون کە لەنێو قوتابییانی توێژینەوەکەیدا هەبوون.