هەڵەیەک روویدا! دووبارە هەوڵبدە
بەشێک لە منداڵانی تووشبووی شێرپەنجە لەنێو ئاهەنگەکە. وێنە: رووداو
رووداو - تەندروستی
بە درووشمی ''هێزی من لە شێرپەنجە زیاترە'' لە دهۆک بە مەبەستی باشترکردنی لایەنی دەروونی و هۆشیارکردنەوەی دایک و باوکان لەبارەی شێرپەنجەی نێو منداڵان، ئاهەنگێک بۆ منداڵانی تووشبووی شێرپەنجە بەڕێوەچوو.
بەهۆی شێرپەنجەوە ئاریان لوقمان هیواخوازە کە بە ئۆنلاین وانەکانی بخوێنێت و دەڵێت: مانگی 11 دەستنیشانکراوە کە تووشبووی شێرپەنجەیە و حەزی لە قوتابخانەیە، دەیەوێت بە ئۆنلاین وانەکانی بخوێنێت.
شەیما عەبدوڵڵا، دایکی ئاریان بە رووداوی گوت، هەستێکی ناخۆشە کە دەرگەی قوتابخانەکان کراونەتەوە و وەرزی قوتابخانەیە، بەڵام ئاریان ناتوانێت بچێت.
بەرپرسی هۆبەی نەخۆشییەکانی شێرپەنجە لە سەنتەری ژین دەڵێت: پشکنینی PET-Scna لە دهۆک نییە و دەبێت بۆ ئەو پشکنینە نەخۆشەکان بنێرنە هەولێر.
عەبدولڕەحمان عەبدوڵڵا، بەرپرسی هۆبەی نەخۆشییەکانی شێرپەنجە لە سەنتەری ژین دەشڵێت: چارەسەری چاندنی مۆخ بۆ شێرپەنجە لە پارێزگاکە نییە و نەخۆشەکان دەگوازنەوە بۆ تورکیا تەنانەت گوتیشی، ''بۆ چارەسەر بە تیشک دەبێت نەخۆشەکان ببرێنە هەولێر و سلێمانی''.
لە ساڵی 2012ـەوە 280 منداڵ لە شێرپەنجە چاکبوونەتەوە، ئەسکەندەر وەسفی کە منداڵێکی چاکبووی شێرپەنجەیە و دەڵێت: ''کە نەخۆشبووم نەترسام و چارەسەرم وەرگرت، گرووپی منداڵپارێزانیش پاڵپشتیان کردم''.
بە گوێرەی ئامارەکانی سەنتەری ژین بۆ چارەسەری شێرپەنجە، لە دهۆک 422 منداڵی تووشبووی شێرپەنجە تۆمارکراون، ساڵانە 50 بۆ 60 منداڵ تووشی نەخۆشییەکە دەبن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ