هەڵەیەک روویدا! دووبارە هەوڵبدە
رووداو - تەندروستی
پسپۆڕێکی چارەسەرکاری دەروونی لە قوتابخانەی پزیشکیی هارڤارد کە خۆی یەکێکە لە چارەسەرکارانی ئالوودەبووان رایدەگەیێنێت، زۆرینەی ئالوودەبووانی کحول دووچاری وشکبوونەوەی بەردەوامی جەستە و ناڕێکیی کۆئەندامی هەرس و شێرپەنجە بوون، تەنانەت دەشڵێت: بەشێکی زۆریان سووڕی خوێنیان تێکچووە.
د. ماتیو ماسکوێرا، پسپۆڕی چارەسەرکاری دەروونی لە قوتابخانەی پزیشکیی هارڤارد و بەڕێوەبەری بەشی مامەڵەکردن لەگەڵ ئالوودەبووان لە نەخۆشخانەی ماکلین دەڵێت: ''کحول یەکێکە لەو مادانەی کە دڵەڕاوکێ زیاددەکات و تواناکانی مێشک لاوازدەکات کە کاریگەریی کورتخایەن و درێژخایەنی دەبێت.
هاوکات گوتی، ''کحول کاریگەریی لەسەر پێکهاتەکانی مێشک دەبێت و دەیانپووکێنێتەوە، ئەمەش توانا مەعریفی و هزرییەکان کەمدەکاتەوە''.
د. ماتیو ماسکوێرا کاریگەرییەکانی وازهێنان لە کحول بەپێی ماوەی وازهێنانەکە شیدەکاتەوە؛
دوای چەند رۆژێک لە وازهێنان؛
- خەوخۆشی و گەیشتن بە خەوی قوڵ
- ئاسوودەیی دەروونیی زیاتر دەبێت
- لێدانی دڵ ئاسایی دەبێتەوە
- پەستانی خوێن هاوسەنگ دەبێتەوە
- جەستە وزەیەکی زیاتری دەبێت
دوای هەفتەیەک لە وازهێنان؛
- سیستمی بەرگریی جەستە بەهێزدەبێتەوە
- هۆرمۆنەکان هاوسەنگدەبنەوە
- ئارەزووی سێکسی دێتەوە باری ئاسایی خۆی
- تەندروستیی جگەر باشتردەبێت و هەوکردنی کەمدەبێتەوە
- ئەگەری تووشبوون بە شێرپەنجە و هەوکردنی جگەر کەمدەبێتەوە
دوای یەک مانگ لە وازهێنان؛
- پێست دەدرەوشێتەوە
- ئاستی هەڵمژینی مادە خۆراکی و ڤیتامینەکان لەلایەن جەستەوە ئاسایی دەبێتەوە
- کێش کەمدەبێتەوە بەهۆی نەمانی کالۆریی نێو کحول {بەمەرجێک خۆراکی پڕ لە کالۆریی نەخورێت}
- بە تەواوی ئەگەری تووشبوون بە نەخۆشییەکانی دڵ و لوولەکانی خوێن بەهۆی کحولەوە کەمدەبێتەوە
- خەو باش دەبێتەوە و لەڕووی دەروونییەوە کەسەکە بە تەواوی ئاسوودە دەبێت
دوای سێ مانگ لە وازهێنان؛
- مێشک دەستدەکات بە دووبارە چاکبوونەوەی خانە تێکشکاوەکان
- توانا هزرییەکان و توانای بیرکردنەوە ئاسایی دەبنەوە
- دڵەڕاوکێ نامێنێت
- زیاتر کەسەکە دەکەوێتە نێو خەوی قوڵەوە
- جەستە هەست بە پشوودانی زیاتر دەکات
دوای زیاتر لە شەش مانگ لە وازهێنان؛
- سیستمی بەرگریی جەستە بە تەواوی ئاسایی دەبێتەوە و بەهێزدەبێت دژی شێرپەنجە و هۆکارەکانی نەخۆشی
- کەمتر جەستە تووشی پەتا وەرزییەکان دەبێت
- فەرمانەکانی هەرسکردن ئاسایی دەبنەوە
- شێداریی جەستە ئاسایی دەبێتەوە و تینوویەتی و وشکبوونەوە نامێنن
- ئەگەری تووشبوون بە شێرپەنجەکانی پەیوەست بە کحول کەمدەبێتەوە
- هەستەکان ئاسایی دەبنەوە و جەستە لە کحول پاکدەبێتەوە
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ