لە رانیە پاشماوە پزیشکییەکانی نۆرینگە و نەخۆشخانە تایبەتەکان لە شوێنی نەگونجاو فڕێدەدرێن

 

درەنگانێکی شەو دوای تەواوبوونی دەوامەکانیان، نۆرینگە و نەخۆشخانە تایبەتەکان پاشماوە پزیشکییەکانیان لەسەر شەقامەکان فڕێدەدەن.

 

کلکەی کۆڵێن لە رانیە شوێنی ژێرخاک خستنی زبڵ و خاشاکی ماڵان، محەممەد حەسەن سێ ساڵە لەم شوێنە لە رێگەی کۆکردنەوەی ئاسن و پاشماوەی پلاستیکی بژێوی ژیانی دابیندەکات، لێم پرسی لەنێو ئەو زبڵ و خاشاکە چیت بینیووە؟ و ئەویش گوتی، ''دەرزیم بینیووە، خوێن و پارچەی گۆشتی مرۆڤیشم بینیوە ئەوانەی بە نەشتەرگەری لابراون لەپاڵ ئەو زبڵ و خاشاکە فڕێدراوانە''.

 

یەکەی لەناوبردنی پاشماوە پزیشکییەکان دەڵێت: رۆژانە زیاتر لە تۆنێک پاشماوەی پزیشکی فڕێدەدەین، لە سنووری ئیدارەی راپەڕین حکومەت دوو شوێنی دیاریکردووە بۆ لەنێوبردنی پاشماوی پزیشکی، نۆرینگە و نەخۆشخانە تایبەتەکانیش دەتوانن پاشماوەکانیان لەو شوێنانە لەنێو ببەن.

 

بۆ هەر کیلۆیەک دوو هەزار دینارییان لێوەردەگیرێت، بەڵام بەشێکیان پابەندی رێنماییە تەندروستییەکان نابن و عەبدولڕەحمان عەبدوڵڵا، بەرپرسی یەکەی لەنێوبردنی پاشماوە پزیشکییەکان دەڵێت: ''رۆژانە ئێمە 100 بۆ 150کیلۆ لە پاشماوەی پزیشکی و 30 کیلۆ دەرمانی بەسەرچوو بە رێگەی زانستی لەنێودەبەین، کە رۆژانە 5 بۆ 8 جار ئەوکارە دەکەین''.

 

ساڵی رابردوو تەندروستیی راپەڕین 45 شوێنیان بەهۆی پابەندنەبوون بەرێنمایەکانیان داخستووە، 73 شوێنی دیکەش بەبڕی 45 ملیۆن دینار سزاداوە.

 

تەندروستیی راپەڕین دەڵێت: لە رێگەی لیژنەکانمانەوە چاودێریی تووندی کلینیک و نەخۆشخانەکان دەکرێت و لە شەش مانگی ئەمساڵ 25 تۆن پاشماوەی پزیشکی لەنێوبراون.

 

تەها محەممەد، بەڕێوەبەری راگەیاندنی تەندروستیی راپەڕین گوتی، هەر شوێنێک بە زانستی پاشماوەکانی فڕێنەدات، سزادەدرێت و رووبەڕووی یاسا دەبێتەوە.

 

بەگوێرەی ئامارەکانی تەندروستیی راپەڕین، ساڵی رابردوو 60 تۆن پاشماوەی پزیشکی و دەرمانی ماوەبەسەرچوو بە رێگەی زانستی لەنێوبراون، لەشەش مانگی ئەمساڵیش نزیکەی 25 تۆن و لەو ژمارەیەش کەمتر لەپێنج تۆن هی نۆرینگە و نەخۆشخانە تایبەتەکان بووە.