بەڕێوەبەری کوتان لە تەندروستیی سلێمانی: ڤاکسینی ئەنفلەوەنزا بەردەستە و هاونیشتمانییان بچن وەری بگرن

 

ئەمڕۆ سێشەممە 1ـی تشرینی یەکەم 2024 د. دەشنێ شەماڵ، بەڕێوەبەری کوتان لە تەندروستیی سلێمانی بە رووداوی راگەیاند، ئەم هەفتەیە 35 هەزار ڤاکسینی ئەنفلەوەنزایان بەدەستگەیشتووە و دەستیشیان کردووە بە دابەشکردنی بەسەر بنکە تەندروستی و نەخۆشخانەکاندا.

 

د. دەشنێ شەماڵ، بەڕێوەبەری کوتان لە تەندروستیی سلێمانی دەڵێت: وەکو هەڵمەت دەمانەوێت لە چاکسازی و شوێنە گشتییەکان ڤاکسینەکان دابەشبکەین، هەروەها دەشڵێت: ''سەلامەتیی ڤاکسینەکان لەلایەن حکومەتی عێراقەوە پشتڕاستکراوەتەوە و سەلامەتن''.

 

بە گوتەی د. دەشنێ، بەهۆی نەبوونی بودجەی تایبەت و کەمیی ستافی تەندروستی، ناتوانن ڤاکسین بگەیێننە ناوچە دوورە دەستەکانی سنووری سلێمانی.

 

لە کۆتاییدا گوتی، ڤاکسینەکە یەک قورچکە و بە دەرزی لەڕێگەی ماسوولکەی قۆڵەوە لێدەدرێت.

 

بەڕێوەبەرایەتیی گشتیی تەندروستیی سلێمانی رایدەگەیێنێت، لە ئەمڕۆوە ڤاکسینی ئەنفلەوەنزانی وەرزی بەردەستە و داوا لە هاونیشتمانییان دەکات، خۆیان بکوتن.

 

 

1- شۆردنی دەستەکان بەمەرجێک دەستشۆردنەکە زیاتر بێت لە 20 چرکە

2- بەکارهێنانی مادەی پاکژکەرەوە بۆ سەر مێز و کەلوپەلەکانی دەوروبەرت

3- بایەخ بە خواردنی سەوزە و میوەکان بدە بەتایبەت مزرەمەنییەکان

4- رۆژانە ئاوی پێویست بخۆرەوە

5- نزیک مەکەورەوە لە کەسی تووشبوو

6- کەسانی تووشبوو لەکاتی کۆکە و پژمە کلینێکس بەکاربهێنن

7- دوورکەوتنەوە لە شوێنی قەرەباڵخ

8- هەواگۆڕکێ لەنێو ماڵدا هەبێت

9- کوتان بە ڤاکسینی ئەنفلەوەنزای وەرزی

10-  دەرزیی تێکەڵە بەکارمەهێنە، چونکە بەرگریی جەستە لاوازدەکات 

11- بە ئاوی شلەتێن یاخود سارد خۆت بشۆ، چونکە بەرگریی جەستە بەهێزدەکات