پسپۆڕێکی خانمان لە دهۆک: جگەرە، نێرگەلە و ڤەیپ خانمان تووشی نەزۆکی دەکات
رووداو - تەندروستی
پسپۆڕێکی خانمان و منداڵبوون لە دهۆک ئاشکرای دەکات، کێشانی جگەرە، نێرگەلە و ڤەیپ نەک تەنیا بە شێوەی راستەوخۆ دووکەڵەکەی، بەڵکو ئەو شوێنەشی جگەرەکەی لێدەکێشرێت زیان بە تاک دەگەیێنێت، بەتایبەت خانمانی دووگیان.
ئەمڕۆ چوارشەممە 1-1-2025 د. لانە حیکمەت، پسپۆڕی خانمان و منداڵبوون لە بەرنامەی نووڕۆژدا لە دهۆکەوە بەشداربوو و گوتی، کاریگەریی کێشانی تووتن و نیکۆتین بۆ خانمان زۆر مەترسیدارترە، چونکە هۆرمۆنەکانیان تێکدەدات و منداڵدانەکانیان لاوازدەکات.
لە بەشێکی قسەکانیدا روونی دەکاتەوە، کێشانی تووتن و نیکۆتین بە ئەگەرێکی زۆرەوە دەشێت ببێتەهۆی نەزۆکبوون و لەماوەی دووگیانیشدا دەشێت ببێتەهۆی لەبارچوونی منداڵ و لاوازیی کۆرپەلە.