کتێبی 'بۆ مێژوو'ـی سەرۆک بارزانی بە زمانی فەرەنسی چاپ دەکرێت

 

بۆ مێژوو، کتێبێکی بەڵگەیی، دۆکیومێنتاریی سیاسی و مێژووییە، باسی خەباتی کورد لەپێناو سەربەخۆیی کوردستان و گشتپرسیی سەربەخۆیی دەکات لە ساڵی 2017. کتێبەکە لەسەر بنەمای بەڵگە باسی بڕیار و ئاڵنگارییەکان و گشتپرسییەکە دەکات کە سەرۆک بارزانی خۆی رێبەرایەتی کرد.

 

چوارشەممە، 17-07-2024، عەلی دۆلەمەڕی، نوێنەری حکومەتی هەرێمی کوردستان لە فەرەنسا بە رووداوی راگەیاند، سبەی کتێبی 'بۆ مێژوو'ـی سەرۆک بارزانی، بە زمانی فەرەنسی چاپ دەکرێت و لە مانگی ئەیلوولدا بڵاودەکرێتەوە.

 

عەلی دۆلەمەڕی گوتی "کتێبەکە بە دیاری دەدرێتە چەند کەسایەتییەکی دیاری سیاسیی فەرەنسا و پەرلەمانتاران."

 

کتێبەکە لەلایەن دکتۆر بەختیار، مامۆستای بەشی زمانی فەرەنسی لە زانکۆی سەلاحەدینەوە وەرگێڕدراوەتە سەر زمانی فەرەنسی.

 

پێشتر، کتێبەکە بە زمانەکانی کوردی (کرمانجی سەروو و خواروو)، عەرەبی، ئینگلیزی، تورکی، فارسی و رووسی چاپ و بڵاوکراوەتەوە.