"دوا رۆژەکانی بابلۆ" لە رووداو پەخش دەکرێت

 

ئەم بەرهەمە شانۆییە کە تۆڕی میدیایی رووداو سپۆنسەری میدیایی نمایشەکە بوو، لە دەرهێنانی شوان کەریمە و نمایشەکانی بە بلیت بوو، بڕیارە کاژێر 23:00ـی پێنجشەممە 29ـی کانوونی یەکەمی 2022 لە رووداو پەخش بکرێت و ماوەکەی یەک کاژێر و 40 خولەکە.

 

"دوا رۆژەکانی بابلۆ" ئەمساڵ 55 رۆژ لە سلێمانی نمایشکرا و زیاتر لە 26 هەزار و 400 بینەری هەبوو.

 

35 رۆژ لە هەولێر نمایشکراوە و 15 هەزار و 700 بینەری هەبوو. لە 28ـی تەممووزی 2022 لە کەرکووک نمایشکرا و بۆ ماوەی حەوت رۆژ بەردەوام بوو و هەزار و 960 بینەری هەبوو. کۆی ژمارەی بینەرانی 44 هەزار و 60 بینەر بوو و کۆی نمایشەکانی 97 نمایش بوو.

 

"دوا رۆژەکانی بابلۆ" بەرهەمێکی شانۆیی کۆمێدی و میوزیک ئامێزە، لە دەرهێنانی شوان کەریمە، سۆران عوسمان و کۆمپانیای سۆ مارکێتینگ بەرهەمهێنەرینە و لاوک ئەبوبەکر وەک یاریدەدەری دەرهێنەر کاری بۆ کردووە و تۆڕی میدیایی رووداو سپۆنسەری میدیایی نمایشەکە بوو لە هەولێر و کەرکووک.

 

لەم بەرهەمە شانۆییەدا رێشان حەمۆ، رووبار خالید، سۆران ئەکرەم، تاهیر عەبدولواحید، هەنار کامەران و ژمارەیەک ئەکتەری دیکە رۆڵی تێدا دەگێڕن.

 

"دوا رۆژەکانی بابلۆ" باس لە چیرۆکی بابلۆی دەوڵەمەند و بەناوبانگ دەکات. بەیانییەک بە سەردانێکی چاوەڕوان نەکراوی یەکێک لە کارمەندەکانی لە خەو هەڵدەستێ، ئەمەش دەستپێکی رۆژێکی دەبێت کە سەرتاپای ژیانی دەگۆڕێت. لە پاڵ چیرۆکی بابلۆ، چیرۆکی عاشقبوونی کچەکەی و شوفێرە تایبەتەکەی هەیە. 

 

شوان کەریم، لە 1991ـەوە لە بواری شانۆدا کاردەکات، لە ساڵی 1994ـەوە لە ئەڵمانیا نیشتەجێیە و لە زانکۆی هانۆڤەر هونەری شانۆی خوێندووە. ئەندامی گرووپە شانۆییەکانی نامۆ، هانۆڤەر 98، ئیمپرۆکۆکن و سکێچ بووە. لە زیاتر لە 50 بەرهەمی شانۆیی وەک ئەکتەر و دەرهێنەر بەشداربووە.

 

هەندێک لە بەرهەمە شانۆییەکانی ئەو شانۆکارە کوردە وەک نووسەر و دەرهێنەر بریتین لە: "کاتمان نەماوە بۆ گۆرانی"، "شەوی نیشتمانی"، "ساڵی سفر"، "هەمیشە یەکێک جێمان دێڵێت"، "گەر بڕیارە نەمرین" و "سەرەتا زۆر سەرەتا". جگە لەم بەرهەمانەی کە بە کوردین، شەش بەرهەمی دیکەی شانۆیی بە زمانی ئەڵمانی هەیە و نووسەری رۆمانێکیشە.