رووداو دیجیتاڵ
نوێترین ئەلبوومی گۆرانیی تایلەر سویفت، گۆرانیبێژی ئەمریکی، کێشەی بۆ پلاتفۆرمی سپۆتیفای لە چەند وڵاتێک دروست دەکات.
ئەم بەرهەمە لە دوای بڵاوکردنەوەی لەو خزمەتگوزارییە میوزیکییە، لە ئەمریکا، فەرەنسا و بەریتانیا کێشەت بۆ پلاتفۆرمەکە دروستکردووە و بەکارهێنەرانی ماوەیەکی زۆر چاوەڕێیان کردووە بۆ ئەوەی بتوانن گوێ لە تراکەکانی ئەلبوومەکە بگرن.
ئەلبوومەکە بەناوی 'Midnights'یە و لە 13 تراکی گۆرانی پێکهاتووە و لە 21 ئەم مانگە بڵاوکرایەوە.
گۆرانییەکانی ئەلبوومەکە باس لە نیوە شەو دەکەن و سویفت لەبارەیەوە دەڵێت، چیرۆکی 13 شەوی بێخەو و پەرش و بڵاوی ژیانیەتی.
هۆگرانی ئەو گۆرانیبێژە لە چەند تویتێکدا ئاماژەیان بۆ ئەوەکردووە، ئەلبوومەکە ژمارەی پێوانەیی شکاندووە و زۆرترین بیسەری هەبووە، بەڵام هێشتا ئەم ریکۆردە بە فەرمی بڵاونەکراوەتەوە.
یەکێک لە تراکەکانی ئەلبوومەکە بەناوی'Anti-Hero'یە و لە 21 ئەم مانگە بەشێوەی ڤیدیۆکلیپ لە کەناڵی تایبەتی ئەو هونەرمەندە بڵاوکرایەوە.
تایلەر سویفت، یەکێک لە هونەرمەندە هەر ناسراوەکانی جیهانە و لەرێگەی بەرهەکانییەوە چەندین ریکۆردی نوێی تۆمارکردووە و ساڵانە ئەلبوومێکی گۆرانی بڵاودەکاتەوە، بە پێچەوانەی بەشێک لە هونەرمەندە جیهانییەکان کە چەند ساڵ جارێک ئەلبوومێک بڵاودەکەنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ