سبەی خەڵاتەکانی فێستیڤاڵی نێودەوڵەتیی هەولێر بۆ شانۆ دابەش دەکرێن

 

فازڵ جاف، سەرۆکی دەستەی دادوەری فێستیڤاڵەکە بە تۆڕی میدیایی رووداوی راگەیاند، رێوڕەسمی کۆتایی فێستیڤاڵ سبەی هەینی کاژێر 11ـی بەیانی لە هۆڵی پێشەوا بەڕێوەدەچێت و خەڵات بەسەر براوەکانی فیستیڤاڵ دابەش دەکرێن.

 

ئاماژەی بۆ ئەوەشکرد، لە فێستیڤاڵەکەدا خەڵات بە باشترین ئەکتەری ژن، باشترین ئەکتەری پیاو، باشترین دەرهێنەر، باشترین نمایش و باشترین سینۆگرافیا دەدرێت.

 

چالاکییەکانی حەوتەمین فێستیڤاڵی نێودەوڵەتی هەولێر بۆ شانۆ، لە 12ـی تشرینی دووەمی 2022 دەستیپێکرد و تاوەکو 18 مانگ بەردەوام دەبێت و رۆژانە لە سێ هۆڵ و سێ کاتی جیاواز بەرهەمی شانۆیی بە خۆڕایی نمایش دەکرێن.

 

جگە لە بەرهەمی شانۆیی کوردستان، بەرهەمی شانۆیی لە وڵاتانی رووسیا، ئۆکراینا، ئیتاڵیا، تورکیا، میسر، تونس، سووریا، ئێران، پۆڵەند، لیبیا، ئوردن و عومان بەشدارن.

 

ئەوەی لە فێستیڤاڵەکەدا سەرنجڕاكێشە؛ بەشداری گرووپی شانۆیی رووسیا و ئۆکراینایە کە ئێستا ئەو دوو وڵاتە لە جەنگدان و بەرهەمی هونەرمەندانی رووسیا لە زۆربەی وڵاتانی جیهان بایکۆتکراون.

 

بڕیارە کاژێر 6:00ـی ئێوارە ئەمڕۆ پێنجشەممە، لە قەڵای هەولێر، شانۆگەری 'رێگا' بەرهەمی وڵاتی رووسیا نمایش بکرێت. 

 

بڕیاربوو حەوتەمین خولی فێستیڤاڵەکە لە 27ـی ئازاری 2022 بەڕێوەبچێت، بەڵام چەند جارێک سازکردنی رەتکرایەوە و لە ماوەی سێ ساڵی رابردووش بەهۆی بڵاوبوونەوەی ڤایرۆسی کۆرۆنا و قەیرانی داراییەوە سێ ساڵ دواخرا.