بەرهەمێکی شانۆیی میسری لە فێستیڤاڵی نێودەوڵەتیی هەولێر بۆ شانۆ نمایشکرا

 

مازن غەرەباوی، نووسەر و دەرهێنەری شانۆگەرییەکە، بە رووداوی راگەیاند: "دڵخۆشم بۆ یەکەمجار لە فێستیڤاڵی نێودەوڵەتیی هەولێر بۆ شانۆ بەشدار دەبم، دڵخۆشییەکی زۆرە، بە هاوکاری نێوان فێستیڤاڵ و یەکێتی هونەرمەندانی عەرەب و سەندیکای سینەماکاران کە بەرهەمەهێنەریەتی، دڵخۆشم نمایشی یەکەمی 'The Meeting' لە فێستیڤاڵی هەولێر بێت، لە هەرێمی کوردستانی عێراق". 

 

گوتیشی "زۆر سوپاسیان دەکەم و کەمێک ماندووشم کردن، بۆ ئەوەی نمایشەکە بە جوانی بکرێت، بەڵام سوپاس بۆ خودا هەست دەکەم کاردانەوەی ئەمڕۆی جەماوەر هۆکاری سەرەکی بوو کە وایکرد ئەو هەوڵە بدەین و سوپاسی مامۆستا هیوا سوعاد دەکەین بۆ هەموو هاوکارییەکانی؛ لە ئامادەکردنی نمایشەکە، هەر لە سەرەتای گەشتەکەوە و تاوەکو نمایشەکە کۆتایی هات. هەروەها زۆ دڵخۆشم بە کاردانەوەی گەورەی جەماوەر لە هەرێمی کوردستانی عێراق و پێیان دەڵێم ئەمە دوا سەردانم نابێت بۆ کوردستان، بێگومان جارێکی دیکە دێمەوە".

 

ئیمان رەجائی، ئەکتەری سەرەکی شانۆگەرییەکە، بە رووداوی راگەیاند، بە بەشداریکردنی لە فێستیڤاڵەکەدا دڵخۆشە لە هەولێر و رێزگرتن و پێشوازیکردن لێیان بەرز دەنرخێنێت، لەگە دەرهێنەری شانۆگەرییەکە هێندەی لە توانیاندا بووە بۆ نمایشەکە کردوویانە.

 

چالاکییەکانی حەوتەمین فێستیڤاڵی نێودەوڵەتی هەولێر بۆ شانۆ، لە 12ـی تشرینی دووەمی 2022 دەستیپێکرد و تاوەکو 18 مانگ بەردەوام دەبێت و رۆژانە لە سێ هۆڵ و سێ کاتی جیاواز بەرهەمی شانۆیی بە خۆڕایی نمایش دەکرێن.

 

جگە لە بەرهەمی شانۆیی کوردستان، بەرهەمی شانۆیی لە وڵاتانی رووسیا، ئۆکراینا، ئیتاڵیا، تورکیا، میسر، تونس، سووریا، ئێران، پۆڵەند، لیبیا، ئوردن و عومان بەشدارن.