رووداو دیجیتاڵ
خەڵاتەکانی سێیەمین فێستیڤاڵی نێودەوڵەتیی فیلمی دەریای سوور دابەش دەکرێن. کورتەفیلمی کوردی "جانتا" خەڵاتی دووەمی لە بەشەی کورتەفیلم، وەرگرت.
پەیام سەربەست، پەیامنێری تۆڕی میدیایی رووداو رایگەیاند، رۆژی پێنجشەممە، 7ـی کانوونی یەکەمی 2023، لە هەشتەمین رۆژی سێیەمین فێستیڤاڵی نێودەوڵەتیی فیلمی دەریای سوور، خەڵاتەکان دابەش دەکرێن. بەربژێرەکان و سەرۆک و ئەندامانی لیژنەی دادوەری لەسەر فەرشی سووری فێستیڤاڵ تێدەپەڕنەوە.
پەیام سەربەست راشیگەیاند، دوو پێشبڕکێی سەرەکی لە فێستیڤاڵەکەدا هەن، یەکەمیان بەشی پێشبڕکێی بەڵگەفیلم، کە 17 فیلم لە پێشبڕکێدان و بەشی پێشبڕکێی کورتەفیلم کە 23 فیلم لە پێشبڕکێدان.
پەیامنێری تۆڕی میدیایی رووداو راشیگەیاند، براوەی یەکەمی پێشبڕکێی بەشی کورتەفیلم، بەخشرایە کورتەفیلمی "somewhere in between" لە دەرهێنانی دالیا نەبلیش کە کچێکی فەرەنسی بەڕەگەز لوبنانی دەرهێنانی بۆ کردووە. کورتە فیلمی کوردی "جانتا" خەڵاتی دووەمی لە بەشی کورتە فیلم وەرگرت.
کورتەفیلمی "جانتا" لە دەرهێنانی هەردوو دەرهێنەری رۆژهەڵاتی کوردستان سامان حوسێنپوور و ئاکۆ زەند کەریمی-یە. فیلمەکە باس لە پەنابەرێکی کورد دەکات کە لەنێو جانتاکەیدا بیرەوەرییەکانی ماڵباتەکەی هەڵگرتووە، دواتر کەسێک ئەو جانتایەشی دەدزێت.
دوو پێشاندانی تایبەت بۆ کورتەفیلمی "جانتا" لە سینەما ڤۆکس لە فێستیڤاڵەکەدا کراوە و سامان حوسێنپوور یەکێک لە دەرهێنەرەکانی لە هەردوو پێشاندانەکەدا ئامادەبوو.
سێیەمین فێستیڤاڵی نێودەوڵەتیی دەریای سوور لە 30ـی تشرینی دووەم تاوەکو 9ـی کانوونی یەکەمی 2023 لە جەدەی سعودیە بەڕێوەدەچێت، ئەمەش دوای ئەو کرانەوە کولتوورییەی ئەو وڵاتە دێت و لە زۆربەی شارەکان فێستیڤاڵی هونەری سازدەکات.
فێستیڤاڵەکە هەرچەند تەمەنێکی کەمی هەیە، بەڵام بەهۆی بانگهێشتکردنی ئەستێرەکانی سینەما لە جیهاندا و پاڵشتیکردنی بەرهەمهێنانی فیلم لە ئاستی جیهاندا، ناوبانگی بە باشی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ