مستەفا فەهمی کۆچی دواییکرد

 

ئەو هونەرمەندە میسرییە لە ئابی ئەمساڵ، بۆ دەرهێنانی گرێیەکی شێرپەنجەیی لە مێشکیدا، نەشتەرگەرییەکی ورد و گەورەی بۆ کرا، لە دوای دەرچوونی لە نەخۆشخانە، لە ماڵەوە چاودێری دەکرا.

 

هەواڵی کۆچی دوایی مستەفا فەهمی، ئەمڕۆ چوارشەممە 30ـی تشرینی یەکەمی 2024 لەلایەن سەندیکای پیشەی ئەکتەری میسری بڵاوکرایەوە.

 

لە کانوونی دووەمی 2024، ئەو ئەکتەرە کاتێک لە فەرەنسا بوو، دووچاری جەڵتەی مێشک بوو، دوای ئەنجامدانی نەشتەرگەرییەک و گەڕانەوەی بۆ میسر، دووبارە جەڵتەیەکی دیکەی مێشک لێیدا.

 

مستەفا فەهمی لە 1942 لەدایکبووە، برای حوسێن فەهمی، ئەستێرەی سینەمای میسرییە، دەرچووی بەشی وێنەگرتن بووە لە پەیمانگەی سینەما، دەستپێکی کاری هونەریی وێنەگرتنی سینەمایی بووە و یەکەم فیلم کە وێنەی گرتووە، فیلمی "شازادەی خۆشەویستیی من" بوو لە 1974، تێیدا حوسێن فەهمی و سوعاد حوسنی رۆڵی سەرەکیان گێڕاوە. لە هەمان ساڵدا وەک ئەکتەر لە بەرامبەر سوعاد حوسنی لە فیلمێکدا رۆڵی گێڕا.

 

کۆی گشتی فیلم و زنجیرە سینەماییەکانی ئەو ئەکتەرە رۆڵی سەرەکییان تێدا گێڕاوە، 150 کاری هونەرییە.