'Avatar' لە ریزبەندی یەکەمی فیلمە پڕداهاتەکانی ئەمریکای باکووردا مایەوە
رووداو دیجیتاڵ
لە ماوەی حەوت هەفتەی رابردوودا ململانێکردن بۆ بەدەستهێنانی ریزبەندی یەکەمی لیستی فیلمە پڕداهاتەکانی ئەمریکا بەهێز بوو و فیلمی 'Avatar: The Way of Water' ماوەی حەوت هەفتەیە لە ریزبەندی یەکەمی لیستەکەدایە.
ئەم بەرهەمە سینەماییە لە حەوتەمەین هەفتەیدا بە کۆکردنەوەی 15 ملیۆن و 700 هەزار دۆلاری ئەمریکی، لە ریزبەندی یەکەمی لیستەکەدا مایەوە و کۆی داهاتی لە سینەماکانی جیهاندا یەک ملیار و سەت ملیۆن دۆلارە و ئێستا چوارەم فیلمی پڕداهاتی جیهانە.
لە ریزبەندی دووەم لیستەکەدا ئەنیمەیشنی 'Puss In Boots: The Last Wish' بەرچاو دەکەوێت کە لە کۆتایی هەفتەی شەشەمیدا 10 ملیۆن و 600 هەزار دۆلاری بەدەستهێنا و کۆی داهاتی 140 ملیۆن و 800 هەزار دۆلارە.
لە ریزبەندی سێیەمدا فیلمە نوێیەکەی تۆم هانکس بەناوی 'A Man Called Otto' بە کۆکردنەوەی شەش ملیۆن و 800 هەزار دۆلار بەرچاو دەکەوێت، ئەمەش لە دوای پێشاندانی لە سێ هەزار و 957 هۆڵی سینەما.
لە ریزبەندی چوارەمەدا فیلمی 'M3GAN' دێت کە داهاتی ئەم هەفتەیەی شەش ملیۆن و 400 هەزار دۆلاری ئەمریکییە و کۆی گشتی داهاتی لە سینەماکانی ئەمریکای باکوور 82 ملیۆن و 300 هەزار دۆلارە.
لە ریزبەندی پێنجەمدا فیلمێکی تەواو جیاواز بەرچاو دەکەوێت، ئەویش فیلمی هیندی 'Pathaan'ـە کە شارۆخ خان و دیپیکا پادکۆن رۆڵی سەرەکی دەگێڕن و توانی بێتە نێو بۆکس ئۆفیسی ئەمریکا و شکست بە پێنج فیلمی بەهێزی ئەمریکا بێنێت و بگاتە ریزبەندی پێنجەم، لەوانە هەردوو فیلمی 'The Fabelmans' و 'Everything Everywhere All At Once' کە بەربژێری بەهێزی ئۆسکاری ئەمساڵن.