هونەرمەند جەمال دیلان، لە ماڵی کولتووری جەلال بەیار
رووداو دیجیتاڵ
لە 14یەمین ساڵیادی کۆچی دوایی جەلال بەیار، ئەکتەری بواری شانۆ و دراما، ماڵێکی کولتووری بەناوی ئەو هونەرمەندە کرایەوە، تێیدا وێنە و ئەرشیفی ئەو هونەرمەندە پارێزراون.
جەمال دیلان، هونەرمەند و برای کۆچکردوو جەلال بەیار، بە رووداوی راگەیاند، لە 14یەمین ساڵیادی کۆچی دوایی هونەرمەند جەلال بەیار، خانوویەکیان لە گەڕەکی عەرەبان لە هەولێر بۆ ئەرشیف و کەرستەکانی ئەو هونەرمەندە تەرخانکردووە. گوتیشی، خانووەکە لەلایەن باب و باپیرانیانەوە بۆیان ماوەتەوە.
ئاماژەی بۆ ئەوەشکرد، کردنەوەی ماڵی کولتووری جەلال بەیار، رێزگرتنە لەو خزمەتەی لە بواری شانۆ و درامادا پێشکێشی کردووە. روونیشیکردەوە، جەلال بەیار، هونەرمەندێکی خاکی بوو و شانۆی کوردی خۆشویستووە.
دیلان، سوپاسی ئومێد خۆشناو، پارێزگاری هەولێر و لقی هەولێری سەندیکای هونەرمەندانی کوردستان کرد، بۆ رێوڕەسمی یادکردنەوەی براکەی.
عەلی ئەحمەد، ئەکتەری بواری شانۆ و دراما، یەکێک لە هاوڕێ نزیکەکانی جەلال بەیار بووە، لەبارەی کەسایەتی ئەو هونەرمەند، بە رووداوی راگەیاند، جەلال بەیار پیاوێکی مەرد بوو و ناحەقی قبوڵ نەدەکرد. گوتیشی، کەسێکی بوێر بوو و لە کاتی پێویست پشت و پەنای هاوڕێکانی بووە.
جەلال بەیار ناوی تەواوی جەلال ئەحمەد رەسووڵە، ئەکتەری شانۆ و دراما بووە، لە 1956 لەدایکبووە، لە 1974 دەستی بە کاری هونەری کردووە، یەکەم بەرهەمی تەلەڤزیۆنی تێیدا بەشداربووە، بەناوی "مارەیی" بوو، دواتریش لە چەندین بەرهەمی دیکەی شانۆیی، تەلەڤزیۆنی و سینەماییدا رۆڵی گێڕاوە.
لە 2012 بەشداری لە بەشی سێیەمی زنجیرەی "گەردەلوول"ـدا کرد، دوای وێنەگرتنی چەند دیمەنێکی زنجیرەکە، لە تەمەنی 56 ساڵیدا لە 27ـی حوزەیرانی 2012 لە هەولێر کۆچی دوایی کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ