لە تایلەند دوو بەڵگەفیلمی رووداو پێشاندران

 

هەردوو بەڵگەفیلمەکە رۆژی شەممە 25ـی تشرینی دووەمی 2023 لە ناوەندی هونەریی 'جیم تۆپسن' لە بانکۆکی تایلەند پێشاندران، دواتریش لە پانێلێکدا بە ئامادەبوونی حەیدەر عومەر، دەرهێنەر و وێنەگری دوو بەڵگەفیلمەکە و سارۆیان ئیسماعیل بەڕێوەچوو کە کاری مۆنتاژی بۆ دوو بەرهەمەکە کردووە. 

 

دەستپێکی چالاکییەکە لە 24ـی تشرینی دووەمی 2023 بوو و پێشانگەیەکی هونەریی تایبەت بە جەنگ و ململانێیەکان لە کوردستان، عێراق و رۆژهەڵاتی ناوەڕاست، لە رێکەوتنی سایکس - پیکۆ تاوەکو هاتنی داعش کرایەوە.

 

لە پێشانگەکەدا بەرهەمی د. روشدی ئەنوەر، هونەرمەندی شێوەکار و مامۆستای زانکۆ لە تایلەند خرانەڕوو و بڕیارە تاوەکو ئاداری 2024 بەردەوام بێت. 

 

'چیرۆکەکانی دوای جەنگ' بەرهەمی 2023یە و باس لە جەنگی هەشت ساڵەی نێوان عێراق و ئێران لە 1980 تاوەکو 1988 دەکات و کارەساتێکی گەورە بەسەر دانیشتووانی هەردوو وڵاتدا هێنا و کاریگەرییەکانی دوورودرێژ بوون.

 

گەلی کوردیش بەدەر نەبووە لە زیانە گەورەکانی ئەو جەنگە، یەکێک لەو کاریگەرییانەی تاوەکو ئێستا و لە داهاتووشدا دەمێنێت، دیلەکانی ئەو جەنگەیە.

 

تاوەکو وردتر بگەڕێی بەدوای ئەو بابەتەدا؛ زیاتر چیرۆکی خەمناک دەدۆزیتەوە، لەم بەڵگە فیلمەی تۆڕی میدیایی رووداودا چیرۆکی پێنج لە دیلەکانی جەنگەکە دەبینن کە مشتێکە لە و خەرمانە گەورەیەی هەزاران ماڵباتی بە بەردەوام دڵتەنگ کردووە. 

 

'کوشتنی شێخ مەحموود' باس لە شێخ مەحموودی حەفید، یەکەم مەلیکی حکومەتی باشووری کوردستان دەکات، بەو پێیەی لە بنەماڵەیەکی دیار و ئایینی و سیاسی پەروەردە بووە؛ لەسەرەتای تەمەنییەوە پێگە و کاریگەری گرنگ و دیاری لە سیاسەتی ناوچەکەدا هەبووە و لەلایەن دۆست و داگیرکەرانیشەوە وەکو کەسایەتییەکی گاریگەر سەیرکراوە. 

 

شێخ مەحموودی حەفید، تەواوی ژیانی لە سیاسەت و ململانێ و داکۆکیکردن لە دۆزی کورد و پرسی نەتەوەییدا بەسەربردووە، لە ژیانی سیاسییدا چەندین رووداوی گرنگ و دیار روویان داون، بەڵام تاوەکو ئێستاش هەندێک لایەنی ژیانی بە نهێنی و شاراوەیی ماونەتەوە، لەم بەڵگەفیلمەی تۆڕی میدیایی رووداودا چەند نهێنییەکی ژیانی دەخرێتەڕوو، گرنگترینیان ئاشکراکردنی کوشتنییەتی لەنێو نەخۆشخانەیەکی شاری بەغدا.

 

روشدی ئەنوەر، خەڵکی هەڵەبجەی باشووری کوردستانە و لە ئوسترالیا دەژی و ماوەیەکە لە تایلەند دەژی و مامۆستای هونەری شێوەکارییە لە زانکۆ.

 

لە 1998 چووەتە دەرەوەی وڵات، لەوێ کاریکردووە و خوێندوویەتی، لە ماوەی 20 ساڵی رابردوودا ناوەڕۆکی کارەکانی زیاتر کۆمەڵایەتی و سیاسی بوونە. 

 

پێشتر پێشانگەیەکی کردووەتەوە، کە باس لە بابەتێکی زۆر باڵکێش دەکات، کەسێک لە کوردستان دوو ملیۆن و 300 هەزار مینی لە زەوی هەڵگرتووەتەوە، ئەو کەسەی کردووەتە پاڵەوانی پێشانگەکەی.