دیمەنێک لە شانۆگەری 'دوا رۆژەکانی بابلۆ'
رووداو دیجیتاڵ
شانۆگەری 'دوا رۆژەکانی بابلۆ' لە دەرهێنانی شوان کەریم، تەنیا سێ رۆژ نمایشی لە هەولێر ماوە و وێستگەی داهاتووی کەرکووک دەبێت.
سۆران عوسمان، بەرهەمهێنەری شانۆگەرییەکە بە رووداوی راگەیاند، لە دوای پشوودانێکی ستافی شانۆگەرییەکە، سبەی پێنجشەممە 28-7-2022 نمایشی دەستپێدەکاتەوە و تەنیا سێ رۆژ بەردەوام دەبێت و دواتر نمایشەکە لە هەولێر دەوەستێنن و وێستگەی داهاتووی شاری کەرکووک دەبێت.
ئاماژەی بۆ ئەوەشکرد، شانۆگەرییەکە 55 رۆژ لە سلێمانی نمایشکرا و زیاتر لە 26 هەزار بینەری هەبوو و 32 رۆژ لە هەولێر نمایشکراوە و زیاتر لە 13 هەزار بینەری هەیە، کۆی ژمارەی بینەرانی لەو دوو شارە 40 هەزار بینەرە.
روونیشیکردەوە، لە دوای کەرکووک، پلانیان هەیە لە شاری دهۆکیش نمایشی بکەن و دواتریش ئەڵمانیا.
'دوا رۆژەکانی بابلۆ' لە سبەی پێنجشەممە تاوەکو شەممە، رۆژانە کاژێر 6:00ـی ئێوارە، لە هۆڵی میدیا لە هەولێر نمایشدەکرێت، یەکەم نمایشی ئەم بەرهەمە لە هەولێر لە 15-6-2022 بوو.
'دوا رۆژەکانی بابلۆ' بەرهەمێکی شانۆیی کۆمێدی و میوزیک ئامێزە، کۆمپانیای سۆ مارکێتینگ بەرهەمهێنەرینە و لاوک ئەبوبەکر وەک یاریدەدەری دەرهێنەر کاری بۆ دەکات، رێشان حەمۆ، رووبار خالید، سۆران ئەکرەم، تاهیر عەبدولواحید و هەنار کامەران و ژمارەیەک ئەکتەری دیکە رۆڵی تێدا دەگێڕن، تۆڕی میدیایی رووداو سپۆنسەری میدیایی نمایشەکەیەتی لە هەولێر.
'دوا رۆژەکانی بابلۆ' باس لە چیرۆکی بابلۆی دەوڵەمەند و بەناوبانگ دەکات، بەیانییەک بە سەردانێکی چاوەڕوان نەکراوی یەکێک لە کارمەندەکانی لە خەو هەڵدەستێ، ئەمەش دەستپێکی رۆژێکی دەبێت کە سەرتاپای ژیانی دەگۆڕێت، لە پاڵ چیرۆکی بابلۆ، چیرۆکی عاشقبوونی کچەکەی و شوفێرە تایبەتەکەی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ