هیو گرانت لە رۆڵی کارەکتەری مستەر رید و لە کاتی پێشاندانی فیلمەکەی لە بەرلین
رووداو دیجیتاڵ
پێشاندانی تایبەتی فیلمی "Heretic" لە بەرلینی ئەڵمانیا بەڕێوەچوو و هیو گرانت، ئەکتەری بەریتانی تەمەن 64 ساڵ لەگەڵ هاوژینەکەی ئانا ئیبرشتاین تەمەن 41 ساڵ، ئامادەبوو.
پێشاندانی فیلمەکە شەوی یەکشەممە 24ـی تشرینی دووەمی 2024 لە سینەمای "Astor Film Lounge" بەڕێوەچوو و ژمارەیەک لە هەوادارانی لە بەردەم سینەماکە ئامادەبوون و رووداو دیمەنی تایبەت بە ئامادەبوونی ئەو ئەکتەرە بڵاودەکاتەوە.
لەم بەرهەمەدا هیو گرانت رۆڵی رید لە چیرۆکێکی ترسناکدا دەگێڕێت، کاری دەرهێنانی بە هاوبەشی لەلایەن سکۆت بەک و بریان وۆدس کراوە.
ماوەی فیلمەکە یەک کاژێر و 51 خولەکە و لە جۆری بەرهەمی ترسناک و تاوانە. چیرۆکەکەی باس لە دوو ژنی کەنیسە دەکات کە دەیانەوێت یارمەتیی پیاوێکی گۆشەگیر بدەن، بەڵام لە ماڵەکەیدا بۆیان دەردەکەوێت کەسایەتییەکی زۆر لەوە ئاڵۆزتری هەیە کە پێشبینیان کردبوو و ناچاریان دەکات بەشداری لە یارییەکی ترسناکدا بکەن.
ئەم بەرهەمە سینەماییە ئێستا لە بەشێک لە سینەماکانی جیهاندا پێشان دەدرێت و داهاتی 31 ملیۆن و 907 هەزار دۆلارە، لەو داهاتە 24 ملیۆن و 766 هەزار دۆلاری لە سینەماکانی ئەمریکای باکوور و حەوت ملیۆن و 141 هەزار دۆلاری لە سینەماکانی دیکەی جیهاندا بەدەستهێناوە.
یەکەم پێشاندانی "Heretic" لە جیهاندا، لە فێستیڤاڵی نێودەوڵەتیی فیلمی تورۆنتۆی کەنەدا بوو لە 8ـی ئەیلوولی 2024 و پێشوازییەکی بەرچاوی لەلایەن بینەرانەوە لێکرا.
هیو گرانت، یەکێک لە ئەکتەرە دیارەکانی سینەمای بەریتانیا و جیهانە، براوەی چەندین خەڵاتی جیهانییە، لەوانە بافتا و گۆڵدن گڵۆب و بەربژێری خەڵاتی ئێمی و پرایم تایم بووە، لە 2006 خەڵاتی شانازیی سیزاری لە فەرەنسا پێبەخشرا. تاوەکو 2018 داهاتی فیلمەکانی سێ ملیار دۆلاری تێپەڕاند، لە 2022 ناوی لە لیستی 50 ئەکتەری دیار لە مێژووی سینەمای بەریتانیا دا هات.
یەکەم فیلم رۆڵی تێدا گێڕابێت لە 1982 بوو بەناوی "Privileged"، لە 1987 لە فیلمێکی رۆمانسی بەناوی "Maurice" رۆڵی سەرەکی گێڕا و پێشوازی لێکرا. لە 1994 لە رێگەی فیلمی کۆمێدی و رۆمانسی "Four Weddings and a Funeral" ناوبانگییەکی زۆری بەدەستهێنا و خەڵاتی بافتا و گۆڵدن گڵۆبی وەک باشترین ئەکتەر بەدەستهێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ