هەولێر دیجیتاڵ
پێشانگەی نێودەوڵەتیی هەولێر بۆ کتێب دەکرێتەوە و 11 رۆژ بەردەوام دەبێت. سەرپەرشتیارەکەی دەڵێت: "پێشانگەکە بە چاودێریی سەرۆک بارزانی دەکرێتەوە و ئەم ساڵ 350 وەشانخانە لە 22 وڵاتی ناوچەکە و جیهانەوە بەشدار دەبن."
ئەمڕۆ سێشەممە، 25-03-2025، ئیهاب قەیسی، سەرپەرشتیاری پێشانگەی نێودەوڵەتیی هەولێر بۆ کتێب بە رووداوی راگەیاند: "حەڤدەیەمین خولی پێشانگەی نێودەوڵەتیی هەولێر بۆ کتێب بە درووشمی (جیهان بە کوردی دەدوێت) بە چاودێریی سەرۆک بارزانی لە رۆژانی 9 بۆ 19ـی نیسانی 2025 لە پارکی سامی عەبدولڕەحمان بەڕێوەدەچێت."
راگەیاندنی پێشانگەی نێودەوڵەتیی هەولێر بۆ کتێب دەڵێت: "پێشانگەکە رۆژانە لە کاژێر 10:00ـی بەیانی تاوەکو 20:00 کراوە دەبێت."
ئیهاب قەیسی گوتی: "ئەم ساڵ 350 وەشانخانە لە 22 وڵاتی ناوچەکە و جیهانەوە بەشدار دەبن. بەشێک لەوانە کە لە وڵاتانی دراوسێ، مەغریب و وڵاتانی کەنداوەوە هاتوون، یەکەم جارە بەشداریی ئەم پێشانگەیە دەکەن. هەموویان لەسەر رووبەرێک کتێبەکانیان نمایش دەکەن کە زیاترە لە 20 هەزار مەتر چوارگۆشە."
سەرپەرشتیاری پێشانگەی نێودەوڵەتیی هەولێر بۆ کتێب گوتی: "دروشمی (جیهان بە کوردی دەدوێت) دروشمی خولی حەڤدەیەمی پێشانگەکەیە، ئەوەش وەک پێزانینێک بۆ زمانی کوردی و ئەو جموجووڵە بەرفراوانەی لە وەرگێڕانی کتێبە جیهانییەکان بۆ سەر زمانی کوردی دەستی پێکردووە."
ئیهاب قەیسی گوتی: "ئەو دروشمە وەک پاڵپشتییەکە بۆ بەفەرمی ناساندنی زمانی کوردی لەلایەن گوگڵەوە" و ئاماژەی بەوەشکرد: "بە درێژایی رۆژانی پێشانگاکە، چەندین پانێڵ و دیبەیتی رۆشنبیری لەبارەی وەرگێڕان و زمان، بە بەشداریی رۆشنبیران، شارەزایانی کورد و عەرەب لە پاڵ چەند وۆرکشۆپێک لەسەر دۆخی خوێندنەوە و گەشەی پیشەسازیی بڵاوکردنەوە بەڕێوەدەچن."
سەرپەرشتیاری پێشانگەی نێودەوڵەتیی هەولێر بۆ کتێب گوتیشی: "هەر لە چواچێوەی چالاکییەکانی پێشانگەکەدا، گفتوگۆی رۆشنبیری و کولتووری جۆراوجۆر بەڕێوەدەچن؛ خوێندنەوەی شیعر و واژۆکردنی کتێبە نوێیەکان و چەند ئاهەنگێکی هونەری و پانێڵی جۆراوجۆر لەبارەی عێراق و ناوچەکەوە بەڕێوە دەچن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ