فیلمی 'زەرگۆن' چیرۆکێکی خۆشەویستی و کێشەی نێوان دوو ماڵبات دەخاتەڕوو
رووداو دیجیتاڵ
'زەرگۆن' فیلمێکی نوێیە لە دەرهێنانی ئادەم ئەیام ئەکرەم، تێیدا باس لە کێشەی کۆمەڵایەتیی نێوان دوو ماڵبات و چیرۆکێکی خۆشەویستی دەکات.
ئادەم ئەیام، دەرهێنەری فیلمی 'زەرگۆن'، بە رووداوی راگەیاند، ئەم بەرهەمە سینەماییە بۆ ماوەی دوو هەفتە لە دۆڵی بالیسان لە سنووری قەزای شەقڵاوە لە پارێزگای هەولێر و دوو هەفتە لە نێو هەولێر و دەرووبەری وێنەگیراوە.
ئاماژەی بۆ ئەوەشکرد، فیلمەکە ئێستا لە قۆناخی مۆنتاژدایە و کار بۆ ئەوە دەکەن ماوەکەی 85 خولەک بێت.
ئەوەشی خستەڕوو، ئەم بەرهەمە لە نووسینی و سیناریۆی موئەیەد کاڕەشە و چیرۆکێکی راستەقینەی هەیە و کراوەتە فیلم، 70٪ رووداوەکانی راستەقینەن و بەر لە 38 ساڵ روویانداوە.
لەم بەرهەمەدا موئەید کاڕەش بە رۆڵی دکتۆر میران و گلێنە مەجید بە رۆڵی ئاڵا رۆڵی سەرەکی دەگێڕن، هەروەها هەریەک ئەحمەد قەڵادزەیی، مەلا ئەحمەد و ماجید شکاک و ژمارەیەک ئەکتەری دیکە لەم بەرهەمەدا رۆڵدەگێڕن.
ئادەم ئەیام، کوڕی ئەیام ئەکرەم (شەمۆ) ئەکتەری کۆمێدییە، لە 2013ـەوە وەک ستافی پشت کامێرا کاری کردووە، فیلمی 'ئەمریکانۆ' دەستپێکی کاری هونەریی بووە، کاری وێنەگرتن و مۆنتاژی بۆ زیاتر لە 50 فیلم کردووە.
ئەو دەرهێنەرە گەنجە کاری دەرهێنانی بۆ شەش کورتەفیلم کردووە، لەوانە کورتەفیلمی 'گۆڵ' کە بەشداری لە چەند فیستیڤاڵێکی نێوخۆیی و نێودەوڵەتیدا کردووە.