رووداو دیجیتاڵ
بە بەشداری 24 گرووپی شانۆیی لە حەوت وڵاتەوە، حه‌وته‌مین فێستیڤاڵی نێوده‌وڵه‌تیی شانۆی شه‌قام له كه‌ركووك به‌ڕێوه‌ده‌چێت.
نامیق هەورامی، بەڕێوەبەری گشتیی پەیوەندییەکانی وەزارەتی رۆشنبیری و لاوانی حکومەتی هەرێمی کوردستان، بە تۆڕی میدیایی رووداوی راگەیاند، فێستیڤاڵه‌كه رۆژانی 19-21ـی تشرینی دووەمی 2023 به چاودێری حه‌مه‌ی حه‌مه‌سه‌عید، وه‌زیری رۆشنبیری و لاوانی حكومه‌تی هه‌رێمی كوردستان سازدەکرێت و به به‌شداری تیپه شانۆییه‌كانی كوردستان، عێراق، سووریا، ئێران، جه‌زائیر، تونس و ئیتاڵیا به‌ڕێوه‌بچێت.
ئاماژەی بۆ ئەوەشکرد، به نوێنه‌رایه‌تی ئه‌و وڵاتانه 24 تیپ و گرووپی شانۆیی ده‌قه شانۆییه‌كانیان له كه‌ركووك نمایش ده‌كه‌ن.
هەورامی، روونیشیکردەوە، به‌ڕێوه‌چوونی فێستیڤاڵه‌كه دوای ئه‌و هه‌وڵانه دێت كه وه‌زیری رۆشنبیری و لاوانی حكومه‌تی هه‌رێمی كوردستان خستیه‌گه‌ڕ له پێناو به‌رده‌وامیدان به فێستیڤاڵەکە و سه‌رخستنی.
نەژاد نەجم، سەرۆکی حه‌وته‌مین فێستیڤاڵی نێوده‌وڵه‌تیی شانۆی شه‌قام له كه‌ركووك، بە تۆڕی میدیایی رووداوی راگەیاند، زیاتر لە یەک مانگ کاری لەسەر کراوە و زۆربەی ئامادەکارییەکان تەواو بوونە و رۆژی یەکشەممە 19ـی تشرینی دووەمی 2023 بە ڕێوڕەسمێکی گەورە فێستیڤاڵەکە لەسەر شەقام دەستپێدەکات و لە هەر دوو سەت مەتری شەقام چالاکییەک سازدەکرێت.
ئاماژەی بۆ ئەوەشکرد، بەشیک لە میوانەکان ئەمڕۆ شەممە دەگەن و بڕیارە سبەی میوانەکانی دیکە بکەن. هیوای ئەوەشی خواست، فێستیڤاڵەکە لە ئاست ئەو چاوەڕوانییەی شانۆکار و هۆگرانی شانۆ بێت و ئەو شەونخونیەی ئەوان بۆ فێستیڤاڵەکە کردوویانە.
له چوارچێوه‌ی چالاكییه‌كانی فێستیڤاڵه‌دا، جگه له نمایشی شانۆ، رێوڕه‌سمی ناساندن بۆ چه‌ند كتێبێك ده‌كرێت و هه‌شت شانۆكاری به ئه‌زموونیش به‌شداری پانێلێكی تایبه‌ت به هونه‌ری شانۆ و ئه‌زموونه‌كانیان له‌و بواره‌دا پێشكێش ده‌كه‌ن.
ده‌ق و نمایشه شانۆییه‌كان و دەرهێنان و نواندنی شانۆكاره‌كان له لایه‌ن لیژنەی تایبه‌تمه‌نده‌وه هه‌ڵده‌سه‌نگێندرێن و خه‌ڵات به‌سه‌ر باشترین ئه‌كته‌ری كوڕ و كچ، باشترین بیرۆكه، به‌رهه‌م و ده‌رهێنه‌ر دابه‌ش دەکرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ