ئەنیمەیشنێکی کوردی لەبارەی قوربانییانی کیمیابارانی هەڵەبجە بەرهەمدێت

 

ئەکرەم سلێمان بە رووداوی راگەیاند، ئەم بەرهەمە پڕۆژەیەکی ئەنیمەیشی بڵندی کوردی - هۆڵەندییە، لە سیناریۆ و دەرهێنانی خۆیەتی، لەگەڵ ئیبراهیم کەریمی ماوەیەکە کاری بۆ دەکەن و ئێستاش کارکردن لەسەری بەردەوامە. 

 

ئاماژەی بۆ ئەوەشکرد، فیلمەکە باس لە منداڵێکی هەڵەبجەیی دەکات کە لە هۆڵەندایە و بۆ یەکەمجار دەگەڕێتەوە شارەکەی کە ماڵباتەکەی بەهۆی کیمیابارانی هەڵەبجەوە لەناوچووە و تەنیا باپیری لە ژیاندا ماوە و بۆ یەکەمجار دەیبینێت.

 

ئەو دەرهێنەرە کوردە لەبارەی بڵاوکردنەوەی ئەم بەرهەمە ئەوەشی خستەڕوو، تاوەکو ئێستا کاتی بڵاوکردنەوەی ئەم بەرهەمە دیار نییە و کارکردن تێیدا بەردەوامە، چونکە کارێکی ئەنیمەیشنی وردە و پڕۆژەیەکی گەورە و تایبەتە، گوتیشی "فیلمەکە لەبارەی مەرگەساتی هەڵەبجەیە و دەمەوێت بە کوالیتی زۆر بەرز پێشکێشی بکەم و بە جیهانی بناسێنم".

 

ئەکرەم سلێمان، دەرهێنەرێکی کوردە و ماوەی 27 ساڵە لە هۆڵەندا دەژی و کاری فیلمسازی دەکات و خاوەنی چەندین بەرهەمە، 'چاوی منیش قاوەییە' نوێترین بەرهەمیەتی.

 

فیلمسازی کورد چەندین بەڵگەفیلم، فیلمی بڵند و کورتەفیلمیان لەبارەی کیمیابارانی هەڵەبجە و ئەنفال و جینۆسایدی کوردە بەرهەمهێناوە و بەشێکیان لە فیستیڤاڵە نیودەوڵەتییەکاندا بەشداربوونە و خەڵاتەیان بەدەستهێناوە.