هێمن حەمەساڵح ڤیدیۆکلیپی 'شاژن' لە باڵەکایەتی وێنەدەگرێت

 

هێمن حەمەساڵح بە رووداوی راگەیاند، گۆرانی "شاژن" لە تێکستی ساڵح بێچار و ئاوازی بورهان موفتی زادەیە، لە بەریتانیا تۆماری کردووە و ماوەی یەک ساڵە ئامادەیە. گوتیشی، دوای گەڕانەوەی بۆ کوردستان بڕیاریدا لە دەڤەری باڵەکایەتی کاری وێنەگرتنی بۆ بکات. 

 

ئاماژەی بۆ ئەوەشکرد، لە باڵەکایەتی هەست دەکەیت لە کوردستانیت و سرووشتێکی جوانی هەیە و پێشتر سەردانی کردووە. هیوای ئەوەشی خواست، بەرهەمەکە پڕۆفیشناڵ دەرچێت و بە دڵی بینەران بێت.

 

هێمن حەمەساڵح، ئەوەشی ئاشکرا کرد، چوار گۆرانی دیکەی ئامادەیە و دەیەوێت لەو ماوەیەی لە کوردستانە، بەرهەمێکی دیکەی لە کۆیە وێنەبگرێت.

 

هێمن حەمەساڵح، لە بەریتانیا دەژی و لە 2006 دەستی بە گۆرانیگوتن کردووە، ژەنیاری چەند ئامێرێکی میوزیکییە، تاوەکو ئێستا حەوت ڤیدیۆکلیپ و 12 تراکی گۆرانی بڵاوکردووەتەوە.