عەبدوڵڵا حەسەنزادە: جێگەی داخە ئێران دەست لە چالاکییە فەرهەنگییەکانی هەرێمی کوردستانیش وەردەدات

 

 

عەبدوڵڵا حەسەنزادە، سیاسەتڤان، نووسەر و وەرگێڕی ناوداری کورد ئەمڕۆ سێشەممە روونکردنەوەیەکی بڵاوکردەوە و تێیدا دەڵێت، کاژێر 14:20 خولەکی دوانیوەڕۆی رۆژی یەکشەممە 12-05-2024 و 40 خولەک پێش دەستپێکردنی دیداری شوکور مستەفا لەلایەن بەڕێوەبەریی دەزگای کەریمی ئەلەکەوە پێی راگەیێندراوە، هێزەکانی ئاسایش دەوری هۆڵی بەڕێوەچوونی رێوڕەسمەکەیان گرتووە و رێگە نادەن دیدارەکە بەڕێوەبچێت.

 

عەبدوڵڵا حەسەنزادە دەڵێت، بەهۆی ئەوەی تێکدانەوەی دیدارەکە بەهۆی ئەوەوە بووە، داوای لێبووردن لە گیانی شوکور مستەفا، دەزگای کەریمی ئەلەکە و ئەوانە دەکات بڕیار بوو گوتار پێشکێش بکەن و بەشداری لە دیدارەکەدا بکەن.

 

عەبدوڵڵا حەسەنزادە کە جگە لە نووسین و وەرگێڕان، زیاتر لە 60 ساڵە چالاکی سیاسی دەکات و سکرتێری پێشووتری حیزبی دیموکراتی کوردستانی ئێرانە و سیاسەتڤانێکی ناسراوی کوردە دەڵێت، رێگریی لە بەڕێوەچوونی ئەو دیدارە بە قەدەر "سەرەموویەک" ئازاری نەداوە، بەڵام بۆ ئەو جێگەی داخ ئەو راستییە تاڵەیە کە دەبینێت، "رێگا بە دەسەڵاتی دژەکوردی کۆماری ئیسلامی دەدرێ تەنانەت دەست لە چالاکییە فەرهەنگی و کۆمەڵایەتییەکانی هەرێمی کوردستانیش وەربدا و دارولەلەیان بۆ دیاری بکات."

 

بڕیاربوو رێوڕەسمی دیداری شوکور مستەفا بە ناوی "وەرگێڕان پردە بەهێزەکەی پەیوەندیی نێوان کولتوورە جیاوازەکان" دوانیوەڕۆی یەکشەممە 12-05-2024 لە سلێمانی ساز بکرێت و تێیدا پانێلێک لەبارەی وەرگێڕان بەڕێوەبچێت و خەڵاتی وەرگێڕی نموونەییش ببەخشرێت بە عەبدوڵڵا حەسەنزادە.

 

رێگریکردن لە بەڕێوەچوونی ئەو دیدارە کاردانەوەی زۆری لە تۆڕە کۆمەڵایەتییەکاندا لێکەوتووەتەوە و ژمارەیەکی زۆر ئەدیب و نووسەر و چالاکڤانی سیاسی و ئەدەبی دژی رێگریکردن لە بەڕێوەچوونی دیدارەکە ناڕەزاییان دەربڕیوە.