رووداو – هەولێر
ئەمڕۆ لە دوای دەستپێکردنی ئۆپەراسیۆنی کۆنترۆلکردنەوەی شنگال، بەشێک لە هونەرمەندان پەیام و پشتگیری خۆیان بۆ پێشمەرگەی کوردستان و خەڵکی شنگال، لە رێگەی (تۆڕی میدیایی رووداو)-ەوە نارد، گارە سازکار-ی هونەرمەندیش دەڵێت "قوربانی دەست و چەکی هێزەکانی پێشمەرگەی کوردستانم".
گارە سازکار، بە (تۆڕی میدیایی رووداو)-ی راگەیاند "دەستخۆشی لە هێزەکانی پێشمەرگەی کوردستان دەکەم، پیرۆزە سەرکەوتنەکان و پیرۆزە کۆنترۆلکردنەوەی شنگال، هیوادەخوازم لەکەمترین ماوەدا هێزەکانی پێشمەرگە تەواوی ئەم شارە لە دەست تیرۆرستان پاکبکەنەوەو خەڵکی شنگال بگەڕێنەوە شارەکەی خۆیان".
سازکار گوتیشی "هێزەکانی پێشمەرگە هەمیشە سەرکەوتنیان تۆمارکردووە، قوربانی دەست و چەکییان بم، پێشمەرگە هەمیشە سەربەرزەو سەری هەموو کوردیشی بەرزکردووەتەوە، دڵنیاشم لە شنگال سەرکەوتنی مێژوویی تۆماردەکەن".
ئەمڕۆ پێنجشەممە 12-ی تشرینی دووەم، هێزی پێشمەرگە بە پشتیوانی فڕۆکە جەنگییەکانی هاوپەیمانان هێرشی کۆنترۆڵکردنەوەی شنگالی دەستپێکرد، کە لە رۆژی 3ی ئابی 2014 کەوتە دەستی چەکدارانی رێکخراوی دەوڵەتی ئیسلامی (داعش).
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ