خەڵاتەکانی تۆنی بۆ بەرهەمە شانۆییەکان دابەشکران

 

شەوی رابردوو 11ـی حوزەیرانی 2023، ئاریانا دیبۆس، ئەکتەری براوەی خەڵاتی ئۆسکار، پێشکێشکاری رێوڕەسمەکە بوو و بەرهەمە شانۆییەکانی لە 29ـی نیسانی 2022 تاوەکو 27ـی نیسانی 2023 بڵاوکراونەتەوە، لە پێشبڕکێدابوون.

 

شانۆیی ' Kimberly Akimbo' خەڵاتی باشترین بەرهەمی میوزیکاڵی و شانۆیی 'Leopoldstadt' خەڵاتی باشترین بەرهەمی شانۆیی بەدەستهێنا. 

 

سیان هایز، خەڵاتی باشترین ئەکتەری لە رێگەی شانۆیی ' Good Night، Oscar' و جودی کۆمەر، خەڵاتی باشترین ئەکتەری ژنی لە رێگەی شانۆیی 'Prima Facie' بەدەستهێنا. 

 

ڤیکتۆریا کلارک، وەک باشترین ئەکتەری ژن لە شانۆیی میوزیکیدا لە شانۆیی ' Kimberly Akimbo' و هاریسن جەی، وەک باشترین ئەکتەری پیاو لەو بوارەدا لە رێگەی شانۆیی 'Some Like It Hot' هەڵبژێردرا.

 

پاتریک ماربەر، شانۆڤانی بەریتانی، خەڵاتی باشترین دەرهێنەری لە رێگەی شانۆیی 'Leopoldstadt' بەدەستهێنا و مایکڵ ئاردن، لە رێگەی شانۆیی 'Parade' خەڵاتی باشترین دەرهێنەری میوزیکاڵی بەدەستهێنا.

 

ناوی خەڵاتی تۆنی بۆ ئەنتۆنیەت پێری، ئەکتەر، دەرهێنەر، بەرهەمهێنەر شانۆی ئەمریکی دەگەڕێتەوە، خەڵاتەکە یەکەمجار بە فەرمی لە 1947 دابەشکرا و بە گرنگترین خەڵاتی شانۆیی لە جیهاندا دەناسرێت.