رووداو دیجیتاڵ
ژمارەیەک هونەرمەندی عەرەب بەهۆی بوومەلەرزەکەی ئەم دواییە، ئاهەنگەکانیان بەبۆنەی رۆژی خۆشەویستییەوە دوادەخەن و هاوخەمی خۆیان بۆ قوربانییان دەربڕیوە.
حوسام رەسام، هونەرمەندی عێراقی، یەکێک لەو هونەرمەندایە کە بەهۆی بوومەلەرزەکەی باکوور و رۆژئاوای کوردستان، تورکیا و سووریا کۆنسێرتەکەی بەبۆنەی رۆژی ڤالانتاین دواخست و لە پۆستێکدا لە هەژمارە تایبەتەکانی لە تۆڕە کۆمەڵایەتییەکاندا، ئاماژەی بۆ ئەوەکردووە، وەک رێزێک لە رووحی قوربانییانی بوومەلەرزە و پیرۆزی ئەو چەند رۆژە، بڕیاریدا ئاهەنگەکەی دوابخات.
رەحمە ریاز، هونەرمەندی عێراقی و ناسیف زەیتون، هونەرمەندی سووری، بەنیازبوون لە 11ـی شوباتی 2023 کۆنسێرتێک لە ئەبوزەبی لە ئیمارات سازبکەن، بەڵام کۆمپانیای رێکخەری ئاهەنگەکە، بەهۆی رووداوی بوومەلەرزەکە بڕیاری دواخستنی ئاهەنگەکەی داوە و رەحمە ریاز پۆستی کۆمپانیاکەی لە ستۆری ئینستگرامەکەی داناوە.
هانی شاکر، هونەرمەندی میسری، یەکێکی دیکە لەو هونەرمەندانەیە کە بەهۆی بوومەلەرزەکە ئاهەنگەکەی بەبۆنەی رۆژی ڤالانتاین لە دیمەشقی سووریا دواخست، ئاماژەی بۆ ئەوەش کردووە، لەگەڵ رێکخەرانی کۆنسێرتەکە و هاوکارانی بڕیاریاندا کۆنسێرتەکە بۆ کاتێکی دیکە دوابخەن.
ژمارەی قوربانییەکان لە گیانلەدەستدان و بریندارەکان، بەردەوام روو لە هەڵکشانە، لە باکووری کوردستان و تورکیا ژمارەی گیانلەدەستدان تاوەکو ئێستا گەیشتووەتە 12 هەزار و 391 کەس، بریندارەکانیش 62 هەزار و 914 کەسن. سەتان باڵەخانەش لە سەرجەم ئەو شارانەی باکووری کوردستان و تورکیا کە بەر بوومەلەرزەکە کەوتوون، رووخاون.
لە رۆژئاوای کوردستان و سووریاش هێشتا گەڕان بەدوای قوربانیانی بوومەلەرزەکە بەردەوامە و تاوەکو ئێستاش 3500 کەس گیانیان لەدەستداوە و 5635 کەسی دیکەش بریندار بوون، زیاتر لە 1000 کەس لەوانەی گیانیان لەدەستداوە لە عەفرینی رۆژئاوای کوردستانن.
کۆی گشتیی ئەو کەسانەش لە باکوور و رۆژئاوای کوردستان و تورکیا و سووریا گیانیان لەدەستداوە، تائێستا 16000 کەسی تێپەڕاندووە، زۆربەیان لە ناوچە کوردنشینەکانی باکوور و رۆژئاوای کوردستانن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ