سەفقان ئۆرکێش شەوانە سروود و گۆرانی لە رووداو پێشکێش دەکات

 

'پاشیڤ' کاژێر یەک تاوەکو سێی بەرەبەیان لە نێو یەکێک لە خانووە دێرینەکانی قەڵای هەولێر پێشکێش دەکرێت، سروودی ئایینی و گۆرانی یەکێک لە بڕگە سەرەکییەکانی بەرنامەکەیە.

 

سەفقان ئۆرکێش، لەگەڵ گرووپێکی میوزیکی لە هەولێر، شەوانە چەند گۆرانی و سروودێکی ئایینی پێشکێش دەکات.

 

گرووپەکە لە شەش ژەنیار پێکهاتوون، شیاو کەمال (ڤایۆلین)، رێبوار عەبدوڵڵا (دەف)،  زانا ئەنوەر (قانوون)، رەزوان خەلیل (نەی)، لێزان قادر (عود) و رێوان رەشاد (دەف)، شەوانە ئاوازی سروودەکانی عەزیزی و چەند پارچە میوزیکێک دەژەنن.

 

سەفقان ئۆرکێش ناوی تەواوی محەممەد رەمەزان حەسەنە، لە 1976 لە عامودای رۆژئاوای کوردستان لە دایکبووە، لە منداڵییەوە دەستی بەکاری هونەری کردووە و لە پارچە تەنەکە و دار ئامێری سازی دروستکردووە و میوزیکی ژەنیوە.

 

لە تەمەنی 11 ساڵییەوە لەگەڵ گرووپی میوزیکی ئاگری گۆرانی گوتووە، بەرهەمەکانی لەسەر کاسێت تۆمار و بڵاوکراوەنەتەوە، ئەو کات یەکەم منداڵ بووە لە رۆژئاوای کوردستان بەرهەمی تۆمارکراوی هەبێت، دواتر لەگەڵ گرووپی میوزیکی ئۆرکێش کاری کردووە.

 

ئۆرکێش، خاوەنی سێ ئەلبوومی گۆرانی و چەندین گۆرانی تاک و ڤیدیۆکلیپیە، جگە لە رۆژئاوا و باشووری کوردستان، کۆنسێرت و ئاهەنگی لە رووسیا، ئیمارات و قەتەر گێڕاوە.

 

جگە لە گۆرانیگوتن، توانای ژەنینی چەندین ئامێری میوزیکی هەیە و بەشێکی زۆر لە گۆرانییەکانی لە نووسین و ئاوازی خۆیەتی.

 

ئەو هونەرمەندە کوردە دوو ساڵە وەک پێشکێشکاری تۆڕی میدیایی رووداو کاردەکات و جگە لە بەرنامەی 'پاشیڤ'، دوو بەرنامەی دیکەی بەناوی 'ئاوازێن رۆژئاڤا' و 'ژ رۆژئاڤا' پێشکێشکردووە.

 

سەفقان ئۆرکێش، لە قامشلۆ دەژی و پێشتر رایگەیاندبوو، وڵاتەکەی لە هەر دۆخێکدا بێت، ئامادە نییە جێبیهێڵێت و لە کوردستان دەمێنێتەوە.