تایلەر سویفت، هونەرمەندی ئەمریکی
رووداو دیجیتاڵ
تایلەر سویفت، گۆرانیبێژی ئەمریکی، ئامادەکاری بۆ بڵاوکردنەوەی کۆپییەکی نوێی ئەلبوومی 'Speak Now' دەکات کە بەر لە 13 ساڵ بڵاوکراوەتەوە.
سویفت، ئەلبوومەکە بە هەمان ناوە و تۆمارێکی نوێی لە ماوەی دوو مانگی داهاتوودا بۆ هەودارانی بڵاودەکاتەوە.
بڵاوکردنەوەی کۆپی نوێی ئەلبوومەکە کە کۆپی یەکەمی لە 2010 بڵاوکراوەتەوە، لە چوارچێوەی هەوڵەکانی ئەو گۆرانیبێژە دێت بۆ دووبارە تۆمارکردن و بڵاوکردنەوەی بەرهەمەکانی پێشووی.
سویفت پێشتر دوو ئەلبوومی دیکەی بەناوی 'Fearless' و 'Red' دووبارە تۆمار و بڵاوکردەوە.
لەلایەکی دیکەوە، سویفت سەرقاڵی تۆمارکردنی چەند گۆرانییەکی نوێیە لە ستۆدیۆ و بڕیارە ئەمساڵ گەشتێکی هونەری ئەنجام بدات و زنجیرە کۆنسێرتێک لە سەرتاسەری جیهان سازبکات.
گەشتە هونەرییەکە لە ئازاری ئەمساڵ دەستپێدەکات و لە مانگی ئاب کۆتایی دێت و پێشبینی دەکرێت داهاتی کۆنسێرتەکانی ئەو گەشتە هونەرییە تەنیا لە ئەمریکا 591 ملیۆن دۆلار بێت.
ئەو هونەرمەندە لە 21ـی تشرینی یەکەمی 2022 نوێترین ئەلبوومی گۆرانیی بەناوی 'Midnights' بڵاوکردەوە و 13 تراکی گۆرانی لەخۆدەگرێت.
گۆرانییەکانی ئەلبوومەکە باس لە نیوە شەو دەکەن و سویفت لەبارەیەوە دەڵێت، چیرۆکی 13 شەوی بێخەو و پەرش و بڵاوی ژیانیەتی.
یەکێک لە تراکەکانی ئەلبوومەکە بەناوی 'Anti-Hero'یە و لە 21ـی تشرینی یەکەمی 2022 بەشێوەی ڤیدیۆکلیپ لە کەناڵی تایبەتی ئەو هونەرمەندە بڵاوکرایەوە.
تایلەر سویفت، یەکێک لە هونەرمەندە هەر ناسراوەکانی جیهانە و لەرێگەی بەرهەکانییەوە چەندین ریکۆردی نوێی تۆمارکردووە و ساڵانە ئەلبوومێکی گۆرانی بڵاودەکاتەوە، بە پێچەوانەی بەشێک لە هونەرمەندە جیهانییەکان کە چەند ساڵ جارێک ئەلبوومێک بڵاودەکەنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ