دیمەنێک لە 'دوا رۆژەکانی بابلۆ'، فۆتۆ: بڵند تاهیر
رووداو دیجیتاڵ
شانۆگەری 'دوا رۆژەکانی بابلۆ' لە دەرهێنانی شوان کەریم، ماوەی 20 رۆژە نمایشی لە هەولێر بەردەوامە، بڕیارە نمایشی لە رۆژانی جەژنیشدا بەردەوام بێت و تۆڕی میدیایی رووداو سپۆنسەری میدیایی نمایشی ئەم بەرهەمە شانۆییە لە هەولێر.
'دوا رۆژەکانی بابلۆ' رۆژانە کاژێر 6:00ـی ئێوارە، لە هۆڵی میدیا لە هەولێر نمایشدەکرێت و یەکەم نمایشی لە هەولێر لە 15-6-2022 بوو، ئەمەش لە دوای ئەوەی بۆ ماوەی 55 رۆژ لە سلێمانی نمایشکرا و زیاتر لە 26 هەزار بینەری هەبوو.
سۆران عوسمان، بەرهەمهێنەری شانۆگەرییەکە بە رووداوی راگەیاند، لە رۆژانی جەژندا، نمایشی 'دوا رۆژەکانی بابلۆ' بەردەوام دەبێت و رۆژانە کاژێر 6:00ـی ئێوارە، لە هۆڵی میدیا پێشوازی لە بینەرانی شانۆ دەکەن.
'دوا رۆژەکانی بابلۆ' بەرهەمێکی شانۆیی کۆمێدی و میوزیک ئامێزە، کۆمپانیای سۆ مارکێتینگ بەرهەمهێنەرینە و لاوک ئەبوبەکر وەک یاریدەدەری دەرهێنەر کاری بۆ دەکات، رێشان حەمۆ، رووبار خالید، سۆران ئەکرەم، تاهیر عەبدولواحید و هەنار کامەران و ژمارەیەک ئەکتەری دیکە رۆڵی تێدا دەگێڕن.
'دوا رۆژەکانی بابلۆ' باس لە چیرۆکی بابلۆی دەوڵەمەند و بەناوبانگ دەکات، بەیانییەک بە سەردانێکی چاوەڕوان نەکراوی یەکێک لە کارمەندەکانی لە خەو هەڵدەستێ، ئەمەش دەستپێکی رۆژێکی دەبێت کە سەرتاپای ژیانی دەگۆڕێت، لە پاڵ چیرۆکی بابلۆ، چیرۆکی عاشقبوونی کچەکەی و شوفێرە تایبەتەکەی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ