سامان هیدایەت: بەنیازبووم پەیکەری مەزهەری خالقی بشکێنم

رووداو – هەولێر

پەیکەرسازی کورد سامان هیدایەت، رایگەیاند کە تاوەکو ئێستا پەردە لەسەر پەیکەری هونەرمەند مەزهەری خالقی لانەدراوە، کە پەیکەرەکە لە شاری سلێمانییە.

سامان هیدایەت، بە رووداوی راگەیاند :" لە شاری هەولێر شوێنیان بۆ پەیکەری هونەرمەند مەزهەری خالقی دیاری نەکرد و رێگەیان نەدا دایبێنم، بۆیە بڕیارمدا پەیکەرەکە بشکێنم، بەڵام چەند هاوڕێیەک پەشیمانیان کردمەوە، دواتریش ئەم بارودۆخەی کوردستانی بەسەرداهات، بۆیە نەمشکاند".

گوتیشی:" دواتر هەوڵماندا لە شاری سلێمانی شوێنێک دیاری بکەین و پەیکەرەکەی لێ دابێنین، ئێستا پەیکەرەکە لە پارکی ئازادی شاری سلێمانی دانراوە، بەڵام تاوەکو ئێستا پەردەی لەسەر لا نەدراوە".
 
هیدایەت گوتیشی، بڕیار وابوو لە رۆژی ڤالانتاین واتە لە 14-ی شوبات پەردە لەسەر پەیکەری هونەرمەند مەزهەری خالقی لە شاری سلێمانی لابدرێت، بەڵام بەهۆی شەهیدبوون و بەدیلگیرانی کۆمەڵێک پێشمەرگە لەم ماوەیەدا چالاکییەکەمان دواخست.

سامان هیدایەت، دەرچووی پەیمانگا و کۆلێژی هونەرەجوانەکانی شاری هەولێرە، بەشی پەیکەرسازی تەواوکردووە و تاکو ئێستا پەیکەری بۆ چەندین هونەرمەند و کەسایەتی ناسراوی کوردستان دروستکردووە، چەند پەیکەرێکیشی لە شارەکانی هەولێر و سلێمانی دانراون.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger