لە سلێمانی شانۆی بووکەڵەی 'هێلانە' نمایشکرا

 

دەرهێنەر ئەلیسن دادل و بووکەڵەساز جۆنی کویک لە بەریتانیاوە بۆ ئەو کار هونەرییە هاتوون و ئەم بەرهەمەیان پێشکێشکرد.

 

ئەم بەرهەمە شانۆییە بینەر دەباتە موسڵ، تێیدا بەدواداچوون بۆ هەمەجۆریی کولتووری و نەریتە زارەکییەکان و هێزی کۆمەڵگە لە پارێزگەی نەینەوا دەکات.

 

جگە لە نمایشی بووکەڵە، پێنج ئەنیشمەیشن و گرافیک نۆڤڵێک پێشکێشکران.

 

هەموو چیرۆکەکان لە ئەنجامی مێژووی زارەکی و وۆرکشۆپەکانی شانۆی بووکەڵەیە، تێیدا کۆمەڵێک گەنجی پێگەیشتوو لە نێوان تەمەنی 18 بۆ 35 ساڵ چیرۆکی فۆلکلۆر و ئەزموونی کەسی و نەریتەکانیان کۆکردبووەوە.

 

شیروان عەلی حەمەخالید، بەڕێوەبەری پڕۆژەکە، بە تۆڕی میدیایی رووداوی راگەیاند، پلانیان هەیە ئەم بەرهەمە شانۆییە لە بەغدا، موسڵ، بەسڕە و هەولێر نمایش بکەن.

 

ئەم چالاکییە بەشێکە لە پڕۆژەی "موسڵ تێڵ" کە لەلایەن کۆمپانیای "Elbarlament" و ئاژانسی "پایا" جێبەجێکراوە و لەلایەن فەرمانگەی دەرەوەی فیدراڵی ئەڵمانیا و ئارتپڵەسەوە پاڵپشتی دارایی دەکرێت.

 

ئاژانسی پایا، خۆی وەک پلاتفۆرمێکی داهێنەرانەی کارگێڕی کۆمەڵایەتی پێناسە دەکات، وەک ناوەندێکی هاوبەش کاردەکات، تاکەکان، رێکخراوەکان و چالاکوانان بەیەکەوە دەبەستێتەوە.