دوو ئەکتەر داوای 500 ملیۆن دۆلار قەرەبوو لە کۆمپانیایەک دەکەن

 

ئەم بەرهەمە سینەماییە لە 1968 بڵاوکرایەوە، ئەوکات ئۆلیڤیا هاسی تەمەنی 15 ساڵ بووە و ئێستا تەمەنی 71 ساڵە، لیۆنار وایتنگ ئەوکات تەمەنی 16 ساڵ بووە و ئێستا تەمەنی 72 ساڵە. 

 

ئەو دوو ئەکتەرە سکاڵاکەیان لە دادگای باڵای لۆس ئەنجلس تۆمارکرد و بەرهەمهێنەرانی فیلمەکە بە دەستدرێژی و گێچەڵی سێکسی و فێڵکردن تۆمەتبار دەکەن.

 

سکاڵاکە بەهۆی دیمەنێکی رووتی ئەو دوو ئەکتەرەیە لە نێو فیلمی 'Romeo and Juliet'، تێیدا وایتنگ رۆڵی رۆمیۆ و هاسی رۆڵی جولیێت دەگێڕێت و فرانکۆ زێفیرێلی دەرهێنەریەتی و لە 2019 کۆچی دوایی کردووە.

 

ئەو دوو ئەکتەرە ئاماژە بۆ ئەوە دەکەن، بەبێ ئاگاداری خۆیان بە رووتی لە فیلمەکەدا وێنەگیراون، ئەمەش پێشێلکردنی یاساکانی ویلایەتی کالیفۆرنیایە لە ئەمریکا کە نابێت منداڵان و نەوجەوانان لە کار و بەرهەمەکاندا بەکاربهێندرێن.

 

کۆمپانیای پارامۆنت پیکچەرز تاوەکو ئێستا هیچ روونکردنەوەیەکی لەمبارەیەوە بڵاونەکردووەتەوە.

 

هوسی، لە هەڤپەیڤینێکیدا لە 2018 بۆ یادی 50 ساڵەی بەرهەمهێنانی فیلمەکە، بەرگری لە دیمەنی رووتی خۆی لە فیلمەکەدا کرد، ئاماژەی بۆ ئەوەشکرد: "پێشتر کەس لە هاوتەمەنەکانی من ئەو کارەی نەکردووە"، روونیشی کردەوە، زێفیرێلی بە سەلیقەیەکی زۆرەوە دیمەنەکەی وێنەگرتووە و بۆ فیلمەکە پێویست بوو.