دینا گۆرانییەکی حەسەن زیرەک دەڵێتەوە

 

دینا، بە تۆڕی میدیایی رووداوی راگەیاند، بەهۆی خۆشەویستیی بۆ هونەرمەند حەسەن زیرەک و حەزی هەواداران، بەرهەمێکی نوێی بڵاوکردەوە کە گوتنەوەی گۆرانی 'ئامینێ گیان'ـی ئەو هونەرمەندە کۆچکردووەیە.

 

ئاماژەی بۆ ئەوەشکرد، کاری میوزیکی ئەم بەرهەمە لە ئێران کراوە و لەلایەن هونەرمەند هەڵکەوت زاهیر و شەماڵ محەممەد ئامادەکراوە. گوتیشی، لە دوای بڵاوبوونەوەی ئەم بەرهەمە، رابیعە خان، هاوژینی هونەرمەند حەسەن زیرەک پەیوەندی پێوەکردووە و دەستخۆشی لێکردووە و داوای لێکردووە بیبینێت.

 

ڤیدیۆکلیپی گۆرانییەکە لەلایەن بڕیار فەتاح وێنەگیراوە و لە کەناڵی تایبەتیی هەڵکەوت زاهیر لە یوتیوب بڵاوکراوەتەوە.

 

هەر بەم دواییە دینا، گۆرانییەکی فۆلکلۆری کوردی بە دەنگی خۆی و بەشێوەی ڤیدیۆکلیپ بڵاوکردەوە کە بەناوی 'ئایە ئۆیە' بوو و پێشتر لەلایەن ژمارەیەک هونەرمەند گوتراوە، لەوانە برایانی زێ زێ و هەردوو هونەرمەند مەرزیە فەریقی و رزگار رەنجەڕو.

 

لەم بەرهەمە نوێیەدا هەردوو هونەرمەند هەڵکەوت زاهیر و شەماڵ محەممەد کاری میوزیکیان بۆی کردووە و ڤیدیۆکلیپەکەی لە دەرهێنانی بڕیار فەتاحە و لە کەناڵی تایبەتی هەڵکەوت زاهیر بڵاوکراوەتەوە.