قوباد تاڵەبانی بۆ رووداو: دۆخی دارایی هەرێمی کوردستان ئاڵۆزە و لەژێر گوشارێکی زۆرداین

 

رۆژی سێشەممە 29-3-2022 قوباد تاڵەبانی، جێگری سەرۆکوەزیرانی هەرێمی کوردستان بۆ بەشدارییکردن لە لووتکەی جیهانیی حکومەتەکان گەیشتە ئیمارات و لە هەڤپەیڤینێکدا لەبارەی دۆخی دارایی هەرێمی کوردستان و پەیوەندییەکانی هەولێر و بەغدا لە بواری وزە وەڵامی چەند پرسیارێکی سەنگەر عەبدولڕەحمان، نێردراوی رووداوی دایەوە. 

 

سەبارەت بە دۆخی دارایی هەرێمی کوردستان قوباد تاڵەبانی بە تۆڕی میدیایی رووداوی راگەیاند "بارودۆخی دارایی هەرێمی کوردستان ئاڵۆزە و لەژێر گوشارێکی زۆردایە، بۆیە دەبێت ئێمە بەردەوام بین لە هەوڵەکانمان بۆ باشترکردنی بارودۆخەکە."

 

سەبارەت بە بەشدارییکردنی سەرۆکوەزیران مەسرور بارزانی و شاندی هەرێمی کوردستان لە کۆڕبەندەکانی دوبەی، قوباد تاڵەبانی گوتی "بێگومان گرنگە بەشداربین لەو کۆڕبەندانە، بۆ شاندەکەمان و وەزیرەکانمان. هەم بەشداردەبین لە پانێڵەکان وەک چۆن ئێستا بەڕێز سەرۆکی حکومەت لە پانێڵێکی گرنگ بەشداربوو و گوتەی خۆی پێشکێش کرد. لە هەمانکاتدا دیدگای فراوانترت دەداتێ لەسەر ئەو خاڵە گرنگانەی بۆ جیهان گرنگن."

 

 

 

قوباد تاڵەبانی: بێگومان گرنگە بەشداربین لەو کۆڕبەندانە، بۆ شاندەکەمان و وەزیرەکانمان. هەم بەشداردەبین لە پانێڵەکان وەک چۆن ئێستا بەڕێز سەرۆکی حکومەت لە پانێڵێکی گرنگ بەشداربوو و گوتەی خۆی پێشکێش کرد. لە هەمانکاتدا دیدگای فراوانترت دەداتێ لەسەر ئەو خاڵە گرنگانەی بۆ جیهان گرنگن، ئێستا ئێمە لە دوبەین و کێشەی شەڕی رووسیا و ئۆکراینا کاریگەریی لەسەر جیهان و نرخی نان و ئارد، ئەوەی لێرە باسدەکرێت دۆزینەوەی چارەسەرە لەنێوان وڵاتەکان و شاندەکان. هەم بەشداریی خۆمان لەم کۆنفرانسە گرنگە هەم فرسەتە چەند وڵاتێکی دۆست لێرەن بۆ ئەوەی پەیوەندییەکانی خۆتیان لەگەڵ پتەو و بەهێز بکەی.

 

 

قوباد تاڵەبانی: بەڕای من نابێ بکەوینە نێو ئەو داوەی بگەڕێینەوە سەر گرنگیی نەوت و گاز، ئێمە وەک هەرێمی کوردستان دەبێ بەرەبەرە دووربکەوینەوە لە نەوت و گاز. راستە نرخی نەوت لەبەر چەند کێشەیەکی جیهانی بەرزبووەتەوە ئەگەر ئەمە ببێتە هۆی تەمبەڵبوونەوەی ئێمە و سبەی نرخەکە دابەزێت تووشی کێشە دەبینەوە. ئێستا کێشەی دیکەش دروستبووە، رەنگە ئێستا زۆر گرنگبێت بۆ هەرێمی کوردستان سوود لە زەوییە بە پیتەکەی ببینێت و گرنگی بە کشتوکاڵ بدرێت ئەمەش نەک تەنیا بۆ بازاڕی خۆمان و عێراق بەڵکو بۆ بازاڕەکانی جیهان گرنگی پێبدرێت و رەنگە لە داهاتوو بۆ ئێمە گرنگ بێت. راستە ئەمڕۆ کێشەی نەوت و گاز هەیە لە جیهان، بەڵام کێشەی خۆراکیش هەیە. بۆیە ئەگەر ئێمە مێشکی خۆمان کۆبکەینەوە لە بابەتی نەوت و گازدا دیسان پێموایە تووشی کێشەی 10 بۆ 20 ساڵی رابردوو دەبینەوە.

 

 

قوباد تاڵەبانی: ئێمە وەک هەرێمی کوردستان دەبێت سوود لە ئەزموونی وڵاتە پێشکەوتوو و سەرکەوتووەکان وەربگرین، پێموایە پشتبەستنی ئێمە بە نەوت بۆ داهات هەڵەیەکی گەورەیە و دەبێت بیرلەوە بکەینەوە چۆن بازاڕ گەشە بکات و چۆن وەبەرهێنان زیادبکات بە ناوخۆ و دەرەکی لە هەموو مەجالێکدا. ئیمارات لەبەرئەوە سەرکەوتوو نییە کە نەوتی هەیە لەبەرئەوەیە کە سیستەمی حکومڕانییەکەیان سەرکەوتووە و دەبێت بیر لە شێوازی بەڕێوەبردن بکەینەوە و چۆن خزمەتگوزارییەکانمان باشتر بکەین، راستە داهاتی نەوت یارمەتیدەر دەبێت بۆ ئەمە، بەڵام ئەوە تاکە چارەسەر نییە و بۆیە سوود وەرگرتن لە ئەزموونی وڵاتان بۆ ئێمە زۆر گرنگە. بە مەرجێک پەیڕەوی بکەین.

 

 

قوباد تاڵەبانی: لە هەندێک بواردا پێشکەوتنمان هەبووە بە تایبەت لە بواری کشتوکاڵ، ئەگەر سەیری ژمارەی پرۆژە پیشەسازییەکان بکەین کە لەم کابینەیەدا پێشکێشکراوە پیشاندەدات کە ئاراستەکەمان بەرەو هەرێمێکی پیشەسازی و کشتوکاڵی دەڕوا و بۆیە دیدگای حکومەت لەم بوارانەدا روونە.

 

 

قوباد تاڵەبانی: دەبێت جارێک چاوەڕێ بکەین و بۆچوونی هەموومان لەسەر ئەوە روونە، ئێستا گرنگ نییە بۆچوونی من چییە، گرنگ ئەوەیە بڕیارێک دەرچووە ئەو بڕیارە بە دڵناییەوە کاریگەریی دەبێت لەسەر کەرتی وزە لە عێراق و هەرێمی کوردستان. ئێمەش بەردەوام دەبین لە کاری خۆمان و چاوەڕێی حکومەتی فیدراڵیی عێراق دەکەین بزانین چۆن مامەڵە لەگەڵ ئەو بڕیارە دەکەن. 

 

 

قوباد تاڵەبانی: بەڵێ، لەگەڵ هەموو کۆمپانیا نەوتییەکان پەیوەندی کراوە، راستییەکی دیکە هەیە کە هیچ کۆمپانیایەکی نەوتیی نێودەوڵەتیی نەهاتووە هەرێمی کوردستان بەبێ ئەوەی خۆی بێت و شاندی خۆیان بێن و هەڵسەنگاندن بۆ دەستووری عێراق و هەڵسەنگاندنی نەوت و گازی هەرێمی کوردستان نەکەن. ئەوان ئەو ریسکەیان نەدەکرد کە کارکردنیان لە هەرێمی کوردستان یاسایی نەبوایە. بۆیە پێموایە کۆمپانیاکانی نەوت و گاز پشتیوانی خۆیان بۆ هەرێمی کوردستان دەربڕیوە. خۆم لە پێشتر گوتوومە و ئێستاش دەیڵێمەوە کە من گەشبینم و ئەوە دەرفەتێکە بۆ ئەوەی بتوانین بگەینە رێککەوتنی یەکلاییکەرەوە لەگەڵ حکومەتی عێراق لە بواری نەوت و گاز، لە چوارچێوەی یاسا بگەینە رێککەوتنێک کە مافی هەرێمی کوردستان پارێزراوبێت و شتێک نەمێنێت لەنێوان هەرێمی کوردستان و بەغدا بەناوی کێشەی نەوت. وەکو دوو حکومەت مامەڵە لەگەڵ ئەو بابەت بکەین و هەمووشتێک بە رەشبینی نابیبم. 

 

 

قوباد تاڵەبانی: بارودۆخی دارایی هەرێمی کوردستان ئاڵۆزە و لەژێر گوشارێکی زۆردایە، بۆیە دەبێت ئێمە بەردەوام بین لە هەوڵەکانمان بۆ باشترکردنی بارودۆخەکە. 

 

 

قوباد تاڵەبانی: منیش دەڵێم دۆخەکە ئاڵۆزە و کوردییەکەم باشە، دۆخەکە ئاڵۆزە و حکومەتی هەرێمی کوردستان گوشاری لەسەرە و دۆخەکە بە گشتی نالەبارە، وڵاتێکین پڕە لە کێشە و لە ناوچەکە و هەرێمیش بەهەمان شێوە پڕە لە کێشە. بۆیە دەبێت ئێمە رەچاوی ئەو دۆخە بکەین و دەشبێت ئارامییەکی ئابووری و سیاسیی بگەڕێنینەوە بۆ هەرێمی کوردستان.