رووداو دیجیتاڵ
لە یاسای بودجەی گشتی عێراقدا بۆ ساڵی 2023، بودجەی تەرخانکراو بۆ جێبەجێکردنی مادەی 140ـی دەستووری عێراق لە 100 ملیار دینارەوە کە حکومەت پەسندیکردووە، کراوەتە 200 ملیار دینار، سەرۆکی دەستەی گشتیی ناوچە کوردستانییەکانی دەرەوەی ئیدارەی هەرێمی کوردستانیش دەڵێت: "ئەو پارەیەی بۆ جێبەجێکردنی قۆناخی یەکەمی ماددەکە تەرخانکراوە، زۆر کەمە".
لە خشتەی خەرجییەکان بەپێی کەرت و چالاکییەکانی یاسای بودجەی گشتی عێراق بۆ ساڵی 2023، ئەو بڕە پارەیەی بۆ لیژنەی جێبەجێکردنی مادەی 140ـی دەستووری عێراق تەرخانکراوە، بڕی 200 ملیار دینارە بۆ هەر ساڵێک، واتە بۆ ساڵی 2023، 2024 و 2025 دەگاتە 600 ملیار دینار.
حکومەتی عێراق لە 15ـی ئاداری 2023، رەشنووسی بودجەی ساڵی 2023ـی رەوانەی پەرلەمان کرد، بەپێی رەشنووسی ئەو کاتەی یاساکە ئەو بڕە پارەیەی بۆ جێبەجێکردنی مادەی 140 تەرخانکرابوو، بڕی 100 ملیار دینار بوو، ئەوەش نیگەرانیی لایەنە کوردستانییەکانی لێکەوتەوە.
رۆژی چوارشەممە، 28-6-2023، فەهمی بورهان، سەرۆکی دەستەی گشتیی ناوچە کوردستانییەکانی دەرەوەی ئیدارەی هەرێمی کوردستان بە تۆڕی میدیایی رووداوی راگەیاند "هەرچەندە پێشتر ئەو برە پارەیەی بۆ لیژنەکە دیاریکرابوو تەنیا 100 ملیار دینار بوو، بەڵام زانیارییمان هەبوو کە پارەی تەرخانکراو بۆ ئەو لیژنەیە زیاددەکرێت، بۆیە ئێستا کە کراوەتە 200 ملیار دینار، باشترە".
فەهمی بورهان پێیوایە هەرچەندە پارەکە زیادکراوە، بەڵام بۆ جێبەجێکردنی مادەی 140 کەمە و گوتی "جێبەجێکردنی مادەی 140ـی دەستووری عێراق سێ قۆناخ لەخۆدەگرێت، ئەوەی زۆر زەحمەتە و پێویستی بە پارە و بودجەی گەورەیە، قۆناخی یەکەمە، کە تاوەکو ئێستا جێبەجێ نەکراوە، بۆیە ئەو 200 ملیار دینارە لەچاو پێویستیی بۆ تەواوکردنی قۆناخی یەکەم زۆر زۆر کەمە، بەشی رێژەیەکی زۆر زۆر کەمی دەکات، بەڵام لەوە باشترە کە هەر بودجەی بۆ تەرخان نەکرێت یان لەوە کەمتر بێت".
لە رەشنووسی بودجەی گشتی عێراقدا پێش پەسەندکردنی لەلایەن پەرلەمانی عێراقەوە، حکومەتی عێراق بڕی 100 ملیار دیناری بۆ جێبەجێکردنی مادەی 140 دابینکردبوو، بەڵام دوای دەستکاریکردنی لەلایەن پەرلەمانەوە، بڕە پارەکەی بۆ دووهێندە زیادکردووە.
یاسای بودجەی گشتیی عێراق بۆ ساڵانى 2023، 2024، 2025ـە و قەبارەى پارەکەى بۆ ساڵی 2023 بریتییە لە 198 تریلیۆن و 910 ملیار و 343 ملیۆن و 590 هەزار دینار؛ لەو بڕە 16 تریلیۆن و 497 ملیار 871 ملیۆن و 89 هەزار دینارى پشکى هەرێمى کوردستانە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ