هەناردەى نەوتى عێراق بۆ ئەمریکا بەڕێژەی 40% بەرزبووەتەوە
رووداو دیجیتاڵ
لە سێ مانگى یەکەمى ساڵى 2023، عێراق زیاتر لە 35 ملیۆن بەرمیل نەوتى بۆ ویلایەتە یەکگرتووەکانى ئەمریکا هەناردەکردووە، کە بەراورد بە هەمان ماوەى ساڵى 2022، هەناردەکردنى نەوتەکەى بۆ ئەو وڵاتە بەڕێژەی 40% زیادی کردووە.
بەگوێرەى داتاکانى کارگێڕیی زانیاریی وزەى ئەمەریکا، لە مانگەکانى کانوونى دووەم، شوبات و ئاداری ئەمساڵ، عێراق 35.03 ملیۆن بەرمیل نەوتى هەناردەى ئەو وڵاتە کردووە.
عێراق لە چارەکى یەکەمى ساڵى 2022ـدا 20.9 ملیۆن بەرمیل نەوتی هەناردەی ئەمریکا کردبوو، بەراورد بە ساڵى 2021 بڕى نەوتە هەناردەکراوەکە 69% زیادیکردبوو، کە ئەو کاتە بڕى هەناردەکراوى نەوتى عێراق لە سێ مانگى یەکەمی 2021ـدا 10.8 ملیۆن بەرمیل بووە.
زۆرترین نەوتی هەناردەکراوی عێراق بۆ ئەمریکا لە ساڵی 2023دا لە مانگى شوبات بووە، کە 12.16 ملیۆن بەرمیل نەوت بووە و کەمترین بڕ لە مانگى ئادار بووە، کە 11.3 ملیۆن بەرمیل نەوت بووە.
رۆژی 26ـی حوزەیرانى 2023، وەزارەتی نەوتی عێراق ئاماری کۆتایی هەناردە و داهاتی نەوتی مانگی ئایاری رابردووی بڵاوکردەوە و ئاشکرای کرد؛ لە مانگی ئایاردا 102 ملیۆن و 463 هەزار و 387 بەرمیلی هەناردە کردووە، داهاتی ئەو نەوتەش گەیشتووەتە 7 ملیار و 324 ملیۆن دۆلار.