رووداو دیجیتاڵ
بازرگانێکی دانیشتووی هەولێر دەڵێت پەتاتەی لە جووتیارانی هەرێمی کوردستان کڕیوە و هەناردەی ئیماراتی کردووە، لە ئەمڕۆیشەوە لە بازاڕی شاری دوبەی دەخرێتەڕوو.
رۆژی پێنجشەممە، 27-07-2023 نەجات کازم، کە بازرگانێکی دانیشتووی هەولێرە بە تۆڕی میدیایی رووداوی گوت: "لە دوو هەفتەی رابردوودا هەشت کۆنتێنەر پەتاتەمان هەناردەی ئیمارات کردووە و نزیکەی 300 تۆن دەبێت، لە هەفتەی داهاتووش بەشێکی دیکە هەناردە دەکەین بە کۆی گشتی سێ هەزار تۆن پەتاتە هەناردەی ئەو وڵاتە دەکەین."
بەگوتەی نەجات کازم، پەتاتەی هەولێر لە ئیمارات خواستێکی زۆری لەسەرە و تەنانەت لە پشکنینی ئەو وڵاتە لە پەتاتەی وڵاتی پاکستانی و میسر باشتر بووە و زۆر بە دڵیان بووە.
بڕیارە ئەمڕۆ لە شاری دوبەی پەتاتەی پارێزگای هەولێر بخرێتەڕوو. نەجات کازم دەڵێت: "ئەو خواستەی لەسەر پەتاتەی هەولێر لە دوبەی هەبوو، ئەو پێشوازیەی لێکرا هێندە زۆر بوو هانیداین زیاتری بکەین."
هەناردەکردنی ئەو بڕە لە پەتاتە لە رێگەی کەرتی تایبەتەوە بووە و حکومەت نەیکردووە. سەبارەت بە هەناردەکردنی سەوزە و میوەی دیکە، ئەو بازرگانە ئاماژەی بەوە کرد، "ئەمساڵ پەتاتە هەناردە دەکەین، بە نیازین ساڵی داهاتوو پیازیش هەناردە بکەین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ