یاریدەدەری وەزیری دەرەوەی ئەمریکا بۆ رووداو: دەمانەوێ هەناردەی نەوتی کوردستان دەستپێبکاتەوە

 

رۆژی چوارشەممە، 27-03-2024، جیۆفری پایات، یاریدەدەری وەزیری دەرەوەی ئەمریکا بۆ سیاسەتی وزەی جیهانی لە وەڵامی دیار کوردە، بەڕێوەبەری نووسینگەی رووداو لە واشنتن گوتی "هەناردەکردنەوەی نەوتی هەرێمی کوردستان، سەرچاوەیەکی وزەیە، کە ئەمریکا بەجیدی دەیەوێت دەستپێبکاتەوە."

 

ئەو بەرپرسە ئەمریکییە هەروەها دەڵێت "هەناردەکردنەوەی نەوتی هەرێمی کوردستان سەرچاوەیەکی ئابوورییە بۆ هەرێمی کوردستان، هاوکات سەرچاوەیەکی دابینکردنی وزەشە بۆ ئەورەپا کە وێڵن بەدوای سەرچاوەی وزەی نارووسیدا."

 

قسەکانی جیۆفری پایات لەکاتێکدان زیاتر لە ساڵێکە هەناردەکردنی نەوتی هەرێمی کوردستان لە رێگەی بۆڕیی نەوتی جەیهان لەسەر سکاڵایەکی عێراق لەدژی تورکیا لەلایەن دادگەی نێوبژیوانیی نێودەوڵەتی لە پاریس، راگیراوە و تائێستا زیانی زیاتر لە 11 ملیار دۆلاری لە عێراق داوە. 

 

لەبارەی سەردانی محەممەد شیاع سوودانی، سەرۆکوەزیرانی عێراق بۆ واشنتن، پایات گوتی "من، دەبمە بەشێک لە گفتوگۆکانی سەردانی سەرۆکوەزیرانی عێراق، بەتایبەتی لە کاری لیژنەی باڵای باڵای عێراق – ئەمریکا، ئێمە لە کۆبوونەوەکەی دوێنێی جێگری سەرۆکوەزیرانی عێراق بە کورتی باسمان لە کاری ئەو لیژنەیە کرد. زۆر روونە کە هەریەک لە پرسەکانی وزە، ئاسایشی وزە، گاز، کارەبا، نەوت و کەمکردنەوەی کاربۆن پرسی سەرەکییمان دەبێت."

 

رۆژی هەینی، 22-03-2024، کۆشکی سپی لە راگەیێندراوێکدا بڵاویکردەوە، رۆژی 15-4-2024 جۆ بایدن، سەرۆکی ویلایەتە یەکگرتووەکانی ئەمریکا لە کۆشکی سپی پێشوازی لە محەممەد شیاع سوودانی، سەرۆکوەزیرانی عێراق دەکات.

 

وەک لە راگەیێندراوەکەی کۆشکی سپیدا هاتووە، مەبەست لە کۆبوونەوەکە دروستکردنی هاوئاهەنگییە لەبارەی ئامانجە هاوبەشەکانی هەردوو وڵات و بەهێزکردنی ئەو پەیوەندییە دوو قۆڵییەی لەنێوان عێراق و ئەمریکادا هەیە.

 

کۆشکی سپی ئاماژە بەوە دەکات، سەرۆکی ئەمریکا و سەرۆکوەزیرانی عێراق "پابەندبوونی خۆیان بە رێککەوتننامەی ستراتیژی دووپات دەکەنەوە؛ هەروەها پابەندبوونی خۆیان بە قووڵکردنەوەی دیدگەی هاوبەشیان بۆ عێراقێکی سەقامگیر، خاوەن سەروەری و خۆشگوزەران، بە جۆرێک کە بە تەواوی ئاوێتەی ناوچەکە بێت، دووپات دەکەنەوە."

 

ئەو هەروەها راشیگەیاند خۆی سەردانی عێراق دەکات بۆ ئەوەی ئەو کار و پرسانەی لەماوەی سەردانی سوودانیدا باسدەکرێن، بەرەوپێش ببرێن.

 

یاریدەدەری بلینکن ئاشکراشی کرد "ئاگادارم حکومەتی عێراق دەیەوێت کۆمپانیای دیکەی بیانی لە کەرتی وزە بانگهێشتی عێراق بکات بۆ نوێکردنەوەی کەرتی وزە، هەروەها زیادکردنی وزەی پاک بۆ عێراقییەکان، بەڵام ئەمە کارێکی قورس دەبێت تاوەکو کێشەی بۆریی نەوتی عێراق تورکیا (نەوتی هەرێمی کوردستان) چارەسەردەکرێت."

 

لەبارەی کردنەوەی بۆریی نەوتی جەیهان بەڕووی نەوتی هەرێمی کوردستان گوتی "پرسی کردنەوەی بۆریی نەوت بەردەوام لە بەرنامەی کارمدا لەگەڵ ئاڵپەئەرسلان بایراکتەر، وەزیری وزەی تورکیا هەبووە. بابەتێکی بەردەوامی گفتوگۆیە، نەک تەنیا لە چوارچێوەی ئەمریکا و عێراقدا، بەڵکو لە چوارچێوەی تورکیا و ئەمریکاشدا. بۆیە زۆر هیوادارم کە بتوانین پێشکەوتن لەسەر ئەم بابەتە ببینین لە پێش سەردانەکەی سەرۆکوەزیران، بەڵام ئەوە لە کۆتاییدا، بەڕاستی گفتوگۆیەکی سێ قۆڵییە لەنێوان بەغدا، هەولێر و ئەنقەرە، دواتریش دانوستاندنە بازرگانییەکان لەگەڵ کۆمپانیاکانمان کە لەوێن."