وەزیری نەوتی عێراق: دەبێت هەرێمی کوردستان رۆژانە 250 بۆ 300 هەزار بەرمیل نەوت رادەست بکات

 

 

حەیان عەبدولغەنی، وەزیری نەوتی عێراق، دووشەممە، 27-01-2025، بە میدیای فەرمی عێراق راگەیاند: "حکومەتی عێراق، پڕۆژەیاسایەکی رەوانەی پەرلەمان کردووە، ئێستا لەژێر لێکۆڵینەوەدایە، کە تایبەتە بە وەرگرتنی نەوتی هەرێمی کوردستان و پێدانی 16 دۆلار بۆ هەر بەرمیلێک وەک سولفە."

 

وەزیری نەوت گوتی: "ئەم سولفەیە بەردەوام دەبێت تاوەکو ئەو کاتەی تێچووە راستەقینەکانی وەبەرهێنانی گاز لە کێڵگەکانی هەرێمی کوردستان، کە بۆ بەرهەمهێنانی نەوت بەکاردێت، دووبارە پێداچوونەوە پێدا دەکرێت."

 

بە گوتەی وەزیری نەوت لە بەرامبەردا، هەرێمی کوردستان دەبێت رۆژانە لانیکەم 250 بۆ 300 هەزار بەرمیل نەوت رادەست بکات، بە مەبەستی هەناردەکردنی لە رێگەی کۆمپانیای بازاڕکردنی نەوتی عێراقیەوە (سۆمۆ)."

 

لەبارەی نرخی نەوت، حەیان عەبدولغەنی گوتی: "نرخی نەوت لە نێوان 70 بۆ 80 دۆلار بۆ هەر بەرمیلێکە، هیوادارین لەم ئاستەدا بمێنێتەوە یان کەمێک بەرزتر ببێتەوە، بە مەبەستی دابینکردنی سەرچاوە داراییە پێویستەکان بۆ بودجەی دەوڵەتی عێراق."

 

شەوی 27-01-2025 فوئاد حوسێن، جێگری سەرۆکوەزیران و وەزیری دەرەوەی عێراق لە دامەزراوەی نارام سین بۆ دیالۆگ و پەرەپێدان لە وەڵامی زیاد ئیسماعیل، پەیامنێری تۆڕی میدیایی رووداو لە بەغدا سەبارەت دۆسیەی نەوتی هەرێمی کوردستان، گوتی: "رێککەوتنمان لەسەر دەقێک کرد، رێكکەوتنێک بوو لەنێوان کۆمپانیاکانی نەوت، حکومەتی هەرێمی کوردستان و حکومەتی فیدراڵی. ئەنجوومەنی وەزیرانی فیدراڵی پەسندی کرد و ناردمان بۆ پەرلەمان بۆ هەمواری یاسای بودجە. ئەگەر ئەم دەقە لە یاسای بودجە بچەسپێت، ئەوا مانای وایە بودجە گۆڕانکاری بەسەردادێت و دەتوانرێت نەوت هەناردە بکرێتەوە".

 

پرۆژەیاسای هەمواری بودجە کە خوێندنەوەی یەکەم و دووەمی بۆ کرابوو، لەلایەن پەرلەمانتارە شیعەکانی پارێزگاکانی خوارووی عێراق گرفتی بۆ دروستکرا و دەنگی لەسەر نەدرا. 

 

فوئاد حوسێن، گوتی:  "جێگەی داخە لە کۆبوونەوەی رابردووی پەرلەمان، ناکۆکی دروست بوو. ئەمڕۆ لەگەڵ جەنابی محەممەد شیاع سوودانی، سەرۆکوەزیران کۆبوونەوەم هەبوو، باسی ئەو بابەتەمان کرد و بەم نزیکانە سەرۆکوەزیران لەگەڵ هەموو سەرۆک فراکسیۆنەکان کۆدەبێتەوە بۆ ئەوەی بتوانین پێش دانیشتنی پەرلەمان بگەینە رێککەوتنێک بۆ ئەوەی ئەم دەقە جێگیربێت. ئەگەر دەقەکە لە یاسای بودجە جێگیرکرا، ئەوکات نەوتی هەرێمی کوردستان هەناردە دەکرێتەوە"

 

هەر سەبارەت بە هەناردەکردنەوەی نەوتی هەرێمی کوردستان، وەزیری دەرەوەی عێراق گوتی، دوێنێ یەکشەممە لەگەڵ هاکان فیدان، وەزیری دەرەوەی تورکیا باسی هەناردەکردنەوەی نەوتی هەرێمی کوردستانیان کردووە و گوتی: "بۆم باسکرد، کە پەیوەندی بەیاسای بودجەوە هەیە، ئەگەر پەرلەمان دەنگی لەسەربدات، ئەوکات نەوت هەناردە دەکرێتەوە".