رووداو دیجیتاڵ
وەزارەتی نەوتی عێراق ئاشکرای کرد، لە مانگی ئۆکتۆبەری ئەمساڵدا زیاتر لە 96 ملیۆن بەرمیل نەوتی خاویان هەناردە کردووە و داهاتی ئەو نەوتەش زیاتر لە 7.6 ملیار دۆلار بووە.
وەزارەتی نەوتی عێراق لە راگەیێندراوێکدا سەبارەت بە بڕی نەوتی خاوی هەناردەکراوی مانگی رابردوو، رایگەیاند: "بەپێی ئامارە کۆتاییەکانی کۆمپانیای فرۆشتنی نەوتی خاوی عێراق - سۆمۆ، بڕی نەوتی خاوی هەناردەکراو لە مانگی ئۆکتۆبەری رابردوودا گەیشتە 96 ملیۆن و 708 هەزار و 660 بەرمیل نەوت؛ داهاتی ئەو نەوتەش گەیشتە 7 ملیار و 666 ملیۆن و 495 هەزار دۆلار".
وەزارەتی نەوتی عێراق راشیگەیاند: "تێکڕای نەوتی خاوی هەناردەکراو لە کێڵگەکانی ناوەڕاست و باشووری عێراق لە مانگی رابردوودا گەیشتە 93 ملیۆن و 386 هەزار و 975 بەرمیل؛ هاوکات هەناردەی نەوتی خاو لە کێڵگەکانی کەرکووکەوە بۆ بەندەری جەیهان گەیشتە 3 ملیۆن و 11 هەزار و 917 بەرمیل".
وەزارەتی نەوتی عێراق ئاشکراشی کرد: "هەر بەرمیلێکی نەوتی خاوی هەناردەکراوی عێراق لە مانگی ئۆکتۆبەری رابردوودا بە 79.274 دۆلار فرۆشراوە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ