رووداو دیجیتاڵ
نوێنەری کۆمپانیاکانی ئاڵوگۆڕی دراوی هەرێمی کوردستان لە رابیتەی کۆمپانیاکانی ئاڵوگۆڕی دراو لە عێراق رایگەیاند، نازانن بانکی ناوەندی لەسەر چ بنەمایەک کۆمپانیاکان سزادەدات، سزای هەندێک کۆمپانیا گەیشتووەتە 20 ملیار دینار.
بانکی ناوەندیی عێراقیش دەڵێت، سزادانی بانک و دامەزراوە داراییەکان لەلایەن لیژنەیەکی تایبەتمەندەوە و بەپێی یاسای بانکەکە و رێنماییەکانی دەکرێت، هۆکاری سزادانیشیان بۆ رێگری لە سەرپێچیکردن دەگەڕێنێتەوە.
بانکی ناوەندیی عێراق لە نووسراوێکدا میکانیزمەکانی سەپاندنی سزای بەسەر بانک و دامەزراوە داراییە نابانکییەکان روونکردەوە و دەڵێت: "سزادان و پێبژاردنەکان لە رێگەی لیژنەیەکی تایبەتمەندیی بانکی ناوەندی دەکرێت کە بۆ کارەکانی پشت بە یاسای بانکی ناوەندیی ژمارە 56ـی ساڵی 2004 و یاسای بانکەکانی ژمارە 94ـی ساڵی 2004 و رێنمایی و رێکارەکانی رێکخستنی کاری بانکی دەکات."
بانکەکە رایگەیاندووە: "هەر سەرپێچییەکی بانک یان دامەزراوەی دارایی نا بانکی لەپێناو رێگریکردنە لێی لە کردنی سەرپێچی ئەو یاسا و رێنمایی و رێکارانەی، ئەوەش لەپێناو پاراستنییەتی و بۆ گەرەنتیکردنی دروستی خۆی و کەرتی داراییە بەگشتی."
ئەحمەد جاف، نوێنەری کۆمپانیاکانی ئاڵوگۆڕی دراوی هەرێمی کوردستان لە رابیتەی کۆمپانیاکانی ئاڵوگۆڕی دراو لە عێراق، بەتۆڕی میدیایی رووداوی راگەیاند: "هێشتا روون نییە بانکی ناوەندی بۆ پێبژاردنەکانی پشت بەچ میکانیزمێک دەبەستێت، ئێمە کۆمپانیامان هەیە یەک ملیار، هەمانە 7 ملیار، هەمانە 20 ملیار دینار سزادراوە، ئەمە بەدڵنیاییەوە کاریگەریی لەسەر کۆمپانیاکان دەبێت و کاریان لاواز دەکات."
بەپێی بەڵگەنامەکانی بانکی ناوەندیی عێراق لە مانگەکانی کانوونی دووەم، شوبات و ئاداری ئەم ساڵ، بانکەکە لە 49 سزای کارگێڕییدا 138 ملیار و 377 ملیۆن و 321 هەزار دینار سزای بەسەر ژمارەیەک بانک و دامەزراوەی دارایی سەپاندووە.
ئەحمەد جاف دەڵێت: "هەندێک دامەزراوە هەیە بە 20 ملیار دینار پێبژاردنی بۆ کراوە، هەر بانکی ناوەندی خۆی رێژەی 50٪ داشکاندنی بۆ پێبژاردنەکەی کردووە، ئەمە مایەی پێکەنینە."
ساڵی رابردوو، بانکی ناوەندی 402 سزای کارگێڕیی بەبڕی 150 ملیار دینار بەسەر ژمارەیەک بانک و کۆمپانیای ئاڵوگۆڕی سەپاند.
بردنە دەرەوەی دۆلار، فرۆشتنی لە بازاڕی رەش و بردنی دۆلار بۆ ئەو وڵاتانەی لەلایەن ئەمریکاوە سزادراون، دیارترین ئەو سەرپێچییانەن بەشێک لە بانکەکانی عێراق و کۆمپانیاکانی ئاڵوگۆڕی دراوی پێ تۆمەتبار دەکرێت و ئەمریکای ناچارکردووە بەشێکیان بخاتە لیستی سزاکانییەوە و لە پێدانی دۆلار بێبەشیان بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ