پێشوازیکردن لە وەزیری وزەی تورکیا لە هەولێر
رووداو دیجیتاڵ
ئاڵپئارسڵان بایراکتار، وەزیری وزەی تورکیا گەیشتە هەولێر و بووە دووەم وەزیری تورکیا لەماوەی چەند کاژێری رابردوودا بگاتە پایتەختی هەرێمی کوردستان.
بەگوێرەی زانیارییەکانی تۆڕی میدیایی رووداو، ئاڵپئارسڵان بایراکتار، وەزیری وزەی تورکیا بەشداری لە کۆبوونەوەی هاکان فیدان، وەزیری دەرەوەی تورکیا لەگەڵ مەسرور بارزانی، سەرۆکی حکومەتی هەرێمی کوردستان دەکات.
سەردانەکەی وەزیری وزەی تورکیا لەکاتێکدایە، لە رۆژی 25ـی مانگی ئاداری 2023، هەناردەکردنی نەوتی هەرێمی کوردستان و کەرکووک بەهۆی بڕیاری دادگەی نێوبژیوانیی نێودەوڵەتی لە پاریس راگیرا.
بەپێی بەدواداچوونی رووداو زیانی راگرتنی نەوتی هەرێمی کوردستان بۆ بەندەری جەیهان، لەو ماوەیەدا نزیکەی 5 ملیار دۆلار بووە.
لەدوای راگرتنی هەناردەکردنی نەوتی هەرێمی کوردستان بۆ بەندەری جەیهان، تورکیا و عێراق چەند جارێک دانوستاندنیان لەسەر هەناردەکردنەوەی نەوتی هەرێمی کوردستان کردووە، بەڵام نەگەیشتوونەتە رێککەوتن.
رۆژی 22ـی ئابی 2023، حەیان عەبدولغەنی، وەزیری نەوتی عێراق، لەگەڵ ئاڵپئارسڵان بایراکتار، وەزیری وزە و سامانە سرووشتییەکانی تورکیا لە ئەنقەرە کۆبووەوە و دواتر هەردوولا راگەیێندراوێکی هاوبەشیان بڵاوکردەوە.
لە کۆبوونەوەکەدا، بەگوێرەی راگەیێندراوەکە، جەخت لەسەر ئەوە کرایەوە؛ دوای نۆژەنکردنەوەی بەشێک لە هێڵی بۆریی گواستنەوەی نەوت کە بەهۆی بوومەلەرزەکەی 6ـی شوباتی 2023 زیانی بەرکەوتووە، "گرنگە لە زووترین کاتدا دووبارە دەست بە هەناردەی نەوت بکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ